O PPdeG lanzará mocións en plenos locais para pedir ao Goberno poder usar remanentes en servizos municipais
"Xa que o presidente da Fegamp fala tanto das dificultades de financiamento dos concellos, é a súa oportunidade para dar voz ao municipalismo e reclamar ao Goberno de Sánchez que nos dea autonomía para investir no que consideremos prioritario", concluíu o vicepresidente primeiro da FEGAMP, Ángel Moldes
Por E.P. | SANTIAGO DE COMPOSTELA | 21/01/2025 | Actualizada ás 17:36
Os concellos do Partido Popular de Galicia mostraron o seu rexeitamento ante "a negativa" do Goberno central a deixar ás entidades locais dispor dos seus remanentes orzamentarias para poder destinalas a mellorar o financiamento dos servizos municipais.
E para "plantar cara" a esta situación, os seus grupos municipais en distintos consistorios da comunidade impulsarán mocións para o seu debate en plenos locais co fin de reivindicar un cambio de postura en relación ao uso das remanentes orzamentarias.
"Nós non temos a culpa dos desastres económicos que poidan existir noutras administracións nin da mala xestión doutros gobernos", advertiu o alcalde de Poio e vicepresidente primeiro da Federación Galega de Municipios e Provincias (Fegamp), Ángel Moldes.
En declaracións aos medios, Moldes aludiu á preocupación existente entre os concellos que "fixeron as cousas ben" e teñen "un superávit" polo feito de que non se lles permita investir en cuestións que poden ser "prioritarias" para a súa sustentabilidade económica.
Neste sentido, volveu a demandar que "se respecte a autonomía" da Administración local para "decidir onde gastar o diñeiro dos veciños", tanto no que se refire a incrementar os servizos públicos que se prestan desde os concellos como a sufragar os sobrecustos que poida xerar a prestación dos mesmos.
REUNIÓN NA SEDE DO PPDEG
"Xa que o presidente da Fegamp fala tanto das dificultades de financiamento dos concellos, é a súa oportunidade para dar voz ao municipalismo e reclamar ao Goberno de Sánchez que nos dea autonomía para investir no que consideremos prioritario", concluíu Moldes, antes de avanzar que o PPdeG levará aos plenos municipais esta reclamación en forma de moción.
A sede do PPdeG acolleu este martes, precisamente, unha reunión informativa con alcaldes e portavoces na que participaron a secretaria xeral da formación, Paula Prado; así como o portavoz do partido na Fegamp, Ángel Moldes; e a responsable de Administración local no Goberno galego, Natalia Prieto.
