Lara Méndez alerta de falta de prazas para dependencia en Galicia: "Moitas veces as persoas morren antes de ser diagnosticadas"

A vicesecretaria xeral do PSdeG, Lara Méndez, volveu alertar sobre o problema de falta de prazas para dependencia en Galicia e sobre a falta de planificación da Xunta a este respecto; unha política de xestión que relacionou co 'non' popular ao decreto ómnibus. Así se expresou na rolda de prensa que ofreceu este luns no Parlamento, na que incidiu na relevancia do problema da dependencia, que se aborda en case todas as sesións plenarias.

A vicesecretaria xeral do PSdeG, Lara Méndez, en rolda de prensa | Fonte: PSDEG

Un problema, sinalou ademais, que é "transversal a todo o territorio" e que debe atallarse con, entre outras medidas, incrementar as prazas en residencias da terceira idade e solucionar os problemas aos que se enfronta o Servizo de Axuda no Fogar (SAF), "que algúns concellos están a asumir o seu sobrecusto". "Estamos a ver como se tardan meses e anos en diagnosticar a un dependente que moitas veces morre antes", lamentou, sinalando que a realidade é que o PP "dilata conscientemente" todos estes procesos porque "non ten unha forma de dar resposta porque non hai prazas públicas en residencias". Disto puxo como exemplo ao Concello de Lugo, "con máis de 40 anos sen prazas públicas, sen planificar" e só coas creadas pola Fundación Amancio Ortega.

"TRAIZÓN" DO PP CO DECRETO ÓMNIBUS

A deputada socialista relacionou isto coa votación en contra do PP ao decreto ómnibus, que cualificou de "traizón". Decisión pola que, avanzou, preguntaralle o secretario xeral do PSdeG, José Ramón Gómez Besteiro, na sesión de control ao presidente da Xunta de Galicia, Alfonso Rueda. "Será unha boa oportunidade para que Rueda nos diga se está de acordo con esa traizón (...), de votar en contra de toda a clase traballadora, os pensionistas e os máis vulnerables, ou se pola contra, rectificará o PP e diralle a Feijóo que así non", comentou.

Para Méndez, esta decisión mostra a "alianza" dos populares coa extrema dereita, "unha preocupante falta de compromiso polo benestar da cidadanía", xa que o decreto incluía medidas para as pensións e o transporte público, entre outros. "Ao votar en contra, o PP decide votar de costas aos estudantes, os traballadores, os pensionistas, os empresarios privados e os dereitos institucionais para o seu benestar. É especialmente preocupante que votase por bloquear a revalorización das pensións, afectando directamente a máis de 600.000 persoas", lamentou.

Así mesmo, alertou do impacto do rexeitamento ás axudas ao transporte público, "que prexudica a máis de 82.000 estudantes e traballadores galegos, e á prórroga da suspensión dos desafiuzamentos, deixando sen protección a numerosas familias que se enfrontan a situacións límite". De feito, Méndez cualificou esta actitude de "cinismo descarado". "Despois de votar en contra destas medidas, tentan manipular o discurso para ocultar que son unha dereita elitista e insensible, allea ás necesidades dos traballadores e maiores".

Criticou tamén a estratexia popular de "copiar propostas do PSdeG e presentalas como propias", sobre o que citou o Banco Público de Aluguer, "unha iniciativa defendida polo portavoz socialista José Ramón Gómez Besteiro e que o PP rexeitara anteriormente no Parlamento". "É unha mostra máis da súa hipocrisía e da súa falta de visión política", remarcou. Por todo iso, Lara Méndez esixiulle ao líder do Executivo autonómico que "deixe de ser un subordinado político de Feijóo" e que "comece a actuar en defensa dos intereses reais dos galegos". "Rueda ten que escoller se está ao lado da xente ou ao lado de Feijóo e da ultradereita que só busca dividir e retroceder", concluíu.

NARCOTRÁFICO EN GALICIA

Noutra orde de cousas, preguntada polas últimas operacións contra o tráfico de drogas desenvolvidas en Galicia, Lara Méndez expresou a súa "preocupación" pero puxo o foco na procura de solucións, "reforzando os modelos xudiciais", como tamén debe facerse, apuntou, coa violencia de xénero. Con todo, incidiu en que Galicia continúa sendo "unha das comunidades autónomas máis seguras en todos os ámbitos".