Declarado de interese autonómico o proxecto do futuro Centro de Alto Rendemento Deportivo de Galicia

O Consello da Xunta aprobou declarar de interese autonómico o futuro Centro de Alto Rendemento de Galicia, que se construirá en Pontevedra e que contará cun investimento de "30 millóns de euros". O Goberno autonómico fai esta declaración ao considerar que este proxecto transcende o ámbito municipal pola súa incidencia territorial, pola súa magnitude e singulares características que o fan portador de "un interese supramunicipal cualificado".

O centro permitirá aumentar os programas de rendemento deportivo que, a día de hoxe, se levan a cabo no Centro Galego de Tecnificación Deportiva (CGTD), en Pontevedra, así como complementar a práctica das novas modalidades con servizos educativos. O novo Centro de Alto Rendemento, que se integrará coa tecnificación do CGTD, permitirá centralizar e xuntar a excelencia deportiva de Galicia nun mesmo recinto onde máis disciplinas deportivas, instalacións e deportistas teñan cabida; conseguir manter o alto nivel do deporte galego en Galicia e alcanzar un maior financiamento do Estado, recolle a Xunta.

"Ademais, vai garantir que ningún profesional terá que buscar fóra de Galicia o seu futuro por falta de infraestruturas idóneas e busca atraer a deportistas de toda España para que desenvolvan a súa carreira na comunidade", indicou Calvo. O futuro proxecto de interese autonómico (PIA) que se desenvolverá a partir desta declaración, prevé un complexo de diferentes equipamentos deportivos duns 120.000 metros cadrados de superficie, situado no municipio de Pontevedra, a tan só sete quilómetros de distancia do CGTD.

Centro Galego de Tecnificación Deportiva | Fonte: deporte.xunta.gal - Arquivo

O centro contará con novas instalacións deportivas que se construirán en fases sucesivas e que acollerán a práctica de diversas disciplinas como bádminton, ximnasia, deportes de combate, baile deportivo, escalada, esgrima ou atletismo, a través dun módulo cuberto. No que respecta á área exterior deportiva, están programados circuítos para BMX, BTT e skate, entre outros. Tamén se desenvolverán zonas comúns, que incluirán aulas para formación, zona administrativa ou servizo médico; así como a residencia para concentracións ou estancias de deportistas de alto nivel.

ACEA DA AMA

Por outra banda, o Consello da Xunta autorizou este luns a tramitación do expediente de contratación, polo procedemento aberto, suxeito a regulación harmonizada, e varios criterios de adxudicación do contrato privado de concesión de servizos da xestión integral do complexo acuático e clínica deportiva de Acea da Ama, por importe de preto de 50 millóns de euros.

Este complexo, de máis de 22.000 metros cadrados de superficie e localizado nunha contorna natural, conta con sala de fitness, zona de augas con cinco piscinas climatizadas, sala de actividades, así como outras instalacións como pistas de tenis, canchas de baloncesto, campos de fútbol, rugby e béisbol, ou piscinas exteriores. A Fundación Deporte Galego ten encomendada a xestión de instalacións deportivas pertencentes á Administración Autonómica como é o caso do complexo acuático e clínica deportiva de Acea da Ama, no Concello de Culleredo.

A empresa concesionaria deberá realizar un investimento de 3 millóns de euros, no primeiro ano desde a obtención da licenza de obra, dentro do que se inclúe a proposta de investimentos para melloras funcionais e de uso como reordenación e adecuación das salas para actividades en soto, proposta de zona de xogos en piscina exterior; ademais doutras actuacións no exterior como zona de pistas de padel e tenis, calistenia, crossfit, parque de maiores ou circuíto de running. O prazo de duración do contrato será de 20 anos cunha previsión de abonados de 8.600 a partir do terceiro ano. A estimación de ingresos anuais do complexo acuático e clínica deportiva é de 2,5 millóns de euros. A Fundación Deporte Galego ingresará un canon anual fixo de 150.000 euros, e un canon variable do 4 % dos ingresos.