Candidaturas de unidade popular da Ribeira Sacra únense para reclamar servizos e a defensa do rural
Tamén apostan por integrar as súas alternativas e demandas nos procesos máis amplos de unidade popular que están xestándose por todo o país.
Por Galicia Confidencial | Trives | 21/04/2016 | Actualizada ás 12:00
Varias candidaturas de unidade popular da Ribeira Sacra mantiveron esta fin de semana un encontro na que decidiron impulsar un foro común para defender o mundo rural e reclamar máis servizos.
Aproveitando as xornadas da montaña celebradas en Trives, estas listas analizaron o chamado “catastrazo”, que grava a riqueza que non existe, a crise do sector lácteo ou a supresión das denominacións de orixe.
Durante a xuntanza tamén amosaron o seu “total e absoluto rexeitamento” ás agresións ao medio rural, en especial do proxecto químico que quere instalarse no Macizo Central e que xa foi rexeitado previamente en Tenerife ou Almería, ou da A-76, “unha navallada para a Ribeira Sacra que só beneficiará ás grandes empresas e cun alto impacto ambiental”.
Tamén apostaron por rematar coas formas “caciquís” de facer política e apostaron por sumar forzas e esforzos para un duplo obxectivo: contribuír a visualizar os problemas do rural e integrar as súas alternativas e demandas nos procesos máis amplos de unidade popular que están xestándose por todo o país.
