Por Galicia Confidencial | Lugo | 22/04/2016 | Actualizada ás 11:00
O presidente da Deputación de Lugo, Darío Campos, xa non atura máis as impertinencias do deputado expulsado do PsdeG e alcalde de Becerreá, Manuel Martínez. Por iso, este xoves, e logo de varias interrupcións por parte de Martínez na comisión informativa do Plan de Obras e Servizos (POS), Campos estoupou e botouno da sala.
E pode non ser a única vez que o faga se Martínez insiste en manter a súa actitude "desafiante". “Empregou o seu ton habitual de confrontación e interrompeu a sesión nun momento no que non tiña a palabra”, explicaron fontes do organismo provincial. O portavoz socialista do goberno provincial, Álvaro Santos, afirmou que o incidente se produciu "unha vez debatido o asunto", cando o deputado non adscrito interrompeu o "desenvolvemento normal" da comisión informativa e fixo algunhas afirmacións pretenciosas" e mesmo "provocadoras".
Avisado polo presidente da Deputación, Darío Campos, de que non estaba no uso da palabra, Martínez mantivo, segundo Álvaro Santos, o seu "ton habitual de confrontación", polo que acabou sendo expulsado.
Pola súa banda, a presidenta do Partido Popular de Lugo e portavoz do grupo provincial, Elena Candia, non descartou achegamentos con este deputado pero dixo que virá marcado pola “temática" do que se vaia a "debater" no pleno, pero nunca por "oportunismo" ou "revanchismo", só se "o asunto é positivo para a provincia.Durante toda esta lexislatura e sempre que teñamos ocasión, imos demostralo".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.