Ourense celebra Os Maios, festa de interese turístico

“Unha aposta firme pola dinamización cultural e polo mantemento das nosas tradicións”, declarou a concelleira de Cultura, Belén Iglesias, na presentación do programa de actividades.

Ademais da tradicional romaría, que comezará o domingo ás 11:00 horas coa colocación dos Maios, este ano engádese a celebración dun concerto de balde na véspera: Prímula, o sábado ás 22:30 horas na praza de San Francisco.

O programa do primeiro de maio estará cheo de música ao vivo a cargo dos gaiteiros Os Carapaos e Os Gomes Mouros, animación, coplas, o xantar na pérgola, xogos populares e a entrega de premios ás 18:30 horas. A festa culminará ás 19:00 horas coa actuación no palco do grupo “Sons do Douro”. Durante toda a xornada, ademais, montarase un Maio de forma tradicional para que todas as persoas que se acheguen á Alameda poidan observar o proceso de elaboración.

A técnica de Cultura, María Díaz, avanzou que xa hai nove agrupacións anotadas para a festa -”cada unha delas achega o seu propio Maio e coplas para a ocasión”, dixo-, pero agardan que, coma todos os anos, sexan moitas máis as que se animen a última hora. Unha das novidades dentro das actividades do domingo, será a presenza dunha polbeira para o xantar.

Na presentación das actividades realizada o pasado martes no salón de plenos do Concello participou tamén a autora do cartel deste ano, a ourensá Ruth González Robles, alumna da EASD Antonio Faílde, gañadora de entre un total de 24 propostas pola claridade, limpeza e frescura da súa proposta.

A Concelleira de Cultura destacou, ademais, a concentración de actividades durante esta fin de semana: “unha aposta global e coordinada por amosar todo o que Ourense ten que ofrecer, reforzada ademais pola oferta de desconto nos traxectos de tren con destino a Ourense que realiza Renfe desde o pasado 23 de abril ao 3 de maio”, dixo Belén Iglesias, “e o esforzo dos establecementos hoteleiros da cidade, que prepararon unha serie de paquetes turísticos para atraer visitantes”.