O BNG esixe ao Goberno sancións a Israel: "Nin sequera se lle excluíu de Eurovisión ou de competicións deportivas"

O portavoz do BNG no Congreso dos Deputados Néstor Rego dirixiuse ao ministro de Asuntos Exteriores, José Manuel Albares, para esixirlle unha posición "contundente" por parte do Goberno español ante Israel. "Condenar o xenocidio do pobo palestino e colocar un punto e final ao comercio, especialmente de armas, coa entidade sionista", sinala a formación que reclama "acabar co comercio con Israel e o fin da ocupación de Palestina".

O portavoz do BNG no Congreso incidiu no mantemento do bloqueo á Franxa de Gaza e chama a atención sobre "a fame que está a sufrir a poboación palestina". Os nacionalistas preguntan a Albares "onde están as sancións ao Estado de Israel por parte do Estado español". "Nin sequera en cuestións simbólicas como excluíla de Eurovisión ou de competeciones deportivas, nin sequera se fixo iso", apostilan. Tamén apunta que hai documentos que "sinalan que hai máis de 46 contratos con empresas de Israel".

"A compra de munición por parte do Ministerio do Interior foi o que saíu recentemente á luz e levantou rexeitamento social e mobilización da opinión pública que lles fixo rectificar, pero están a permitirse escalas de barcos con armas para Israel en portos do Estado e tamén a saída de voos desde Zaragoza con material de dobre uso cuxo destino é Israel", afirma para insistir en "que hai que acabar co comercio co Estado de Israel".

O deputado do BNG Néstor Rego durante unha sesión plenaria no Congreso dos Deputados, a 8 de abril de 2025, en Madrid | Fonte: A. Pérez Meca - Arquivo