"Como mestre, como representante público e como veciño, pídolle que escoite"

O tenente de alcalde de Caldas de Reis, Manuel Fariña, escribiu ao conselleiro de Educación, Ciencia, FP e Universidades, Román Rodríguez, unha carta "como mestre" para solicitarlle a reapertura dunha aula de Infantil do CEIP San Clemente, suprimida o curso pasado.

O concelleiro, do BNG, remitiu esta misiva na que se reivindica como persoa que "coñece ben" o citado colexio e "que leva anos defendendo que a educación é un dereito e unha prioridade, nunca un gasto". Por iso, sabe o que "representa" o CEIP San Clemente para a parroquia, "para as familias que cada mañá levan aí aos seus fillos e para un profesorado que traballa con vocación e constancia". "E sei que vostede tamén o coñece, porque estivo alí hai uns anos para anunciar unha reforma integral tan necesaria como esquecida pola súa administración", esgrime a continuación.

Neste contexto, Fariña relata como a decisión de suprimir o curso pasado a terceira unidade de Infantil "caeu como un golpe duro", pero máis aínda "a súa negativa a abrila agora que a matrícula neste centro aumenta". "Resulta ademais totalmente incomprensible", apostila. Isto, subliña a carta, implica "aulas máis cheas, menos atención individual, preocupación nas familias e decepción" entre quen loitan "pola escola pública". Así, o tenente de alcalde de Caldas advirte que este tipo de decisións "non poden tomarse só con cálculo estatístico".

Fariña insiste en que a súa carta "non pretende confrontar, senón apelar á responsabilidade compartida" aínda que as "competencias" neste asunto son da Administración galega. Así a todo, solicita ao conselleiro unha rectificación e que se reabra a aula: "Sería un sinal de respecto á comunidade educativa e unha mostra de que a Xunta segue crendo no ensino público como columna vertebral do país".

"Como mestre, como representante público e como veciño, pídolle que escoite. Que mire máis aló dos números. Que pense nos nenos e nenas que están a piques de comezar a súa etapa escolar e que merecen facelo en condicións dignas. Que pense no futuro de Caldas de Reis", conclúe o tenente de alcalde.

Román Rodríguez visita un centro no inicio do curso escolar. XUNTA DE GALICIA