Un sistema de valado virtual para evitar accidentes de animais nas estradas

A Xunta proba un novo sistema de valado virtual para evitar a irrupción de animais nas estradas. Para iso, instalou este mecanismo, como proba piloto, na estrada LU-540. O obxectivo, segundo explicou o Executivo galego, desta ferramenta é disuadir ao animal para que non acceda a un treito da calzada cando existen vehículos en circulación.

O valado virtual detecta as luces dos vehículos en circulación, activa dous sistemas disuasorios activos, un luminoso a través de escintileos, e outro sónico, orientados cara ao exterior da estrada, co fin de deter o avance do animal antes de que acceda á calzada. A instalación destes elementos disuasorios activos ao longo das dúas beiras dunha estrada conforma un sistema que se vai activando por treitos cando circulan vehículos e permanecendo inactivo cando non hai tráfico rodado.

A alimentación dos dispositivos é autónoma, por medio de paneis solares individuais e baterías integradas, sen conexión á rede. Tanto os paneis como as baterías dispoñen da capacidade necesaria para manter o seu funcionamento adecuadamente durante todo o período nocturno.

Animal atropelado nunha estrada da provincia de Ourense | Fonte: GARDA CIVIL