O BNG denuncia "persecución" laboral na residencia de Caranza, onde a Xunta busca "reconducir" a situación
O alcalde de Foz acode ao pleno do Parlamento para denunciar que non o recibe a conselleria de Política Social, quen o acusa de "teatralizar".
Por Europa Press / Redacción | LUGO | 21/05/2025 | Actualizada ás 15:14
O deputado do BNG Ramón Fernández Alfonzo denunciou "persecución" laboral na residencia de maiores de Caranza, en Ferrol, polo que esixe o cesamento da súa directora tras a apertura de 21 expedientes disciplinarios a traballadoras. No pleno do Parlamento galego, a conselleira de Política Social, Fabiola García, asegurou que a Xunta media para "reconducir" a situación nesta residencia, na que recoñece que "o clima laboral non é o adecuado". O Bloque alerta de que nesa residencia abríronse 21 expedientes a empregadas entre 2024 e 2025, 12 deles tras unha concentración, nun persoal de 120 persoas. Un ambiente laboral "tóxico" que contrasta con que en toda a provincia da Coruña só hai tres expedientes entre 2.000 empregados. "Como pode ser que toleren e alimenten unha xestión disfuncional e tóxica na residencia de Caranza", cuestionou o deputado nacionalista, quen reclama a retirada destes expedientes abertos ás empregadas.
Así mesmo, Fernández Alfonzo afeou á Xunta que as traballadoras de residencias privadas suman a súa cuarta xornada de folga "sen que as recibise" a conselleira "en contra do acordo unánime deste Parlamento", unha decisión que achaca a Fabiola García "antepón intereses económicos das grandes empresas" aos "lexítimos das traballadoras". En resposta, Fabiola García sostén que a Xunta media para "alcanzar o maior consenso posible", para o que manteñen reunións periódicas co comité, recóllense suxestións do persoal e faise un estudo sobre riscos psicosociais. Tamén expón que a residencia cumpre co cociente de persoal e investíronse nos últimos anos 1,5 millóns en equipamentos no centro.
PRESENZA DE ALCALDE DE FOZ NO PLENO
Por outra banda, a deputada socialista Lara Méndez preguntou á conselleira de Política Social "por que se nega" a recibir ao alcalde de Foz, Francisco Cajoto (PSdeG) --quen acudiu ao pleno deste mércores--, para abordar a situación da residencia do municipio. Méndez acusa a Fabiola García de só manter reunións "groseiramente partidistas" con rexedores do PP. Lamenta o "modelo de xestión herdado do PP" nesta residencia e reclama á Xunta a que "se comprometa a concertar prazas" nese centro.
Respecto diso, a conselleira acusou ao alcalde de visitar o Parlamento porque "realmente o que lle gustan son as fotos" e só quere "teatralizar". Asevera que non existe "ningún trato desigual" co Concello de Foz. Incide en que ao alcalde "non lle importa a residencia", "impórtanlle as fotos". "Plantouse no meu despacho", conta García, cando ela nin estaba e "fíxose un selfi". "Cortoume o paso" en Ribadeo, proseguiu no seu relato, para "facer a foto".
García expón que a residencia de Foz é de xestión municipal porque o anterior goberno popular "decidiu no seu día darlle servizo e atención a todos os veciños", pois explica que se fose de xestión pública, entraríase por lista de espera e "non terían prioridade" os veciños focenses. Apunta que en dous meses transferirase o inmoble para que sexa "integramente" de propiedade municipal.
