O PSdeG-PSOE pide a activación do Comité Ético da Deputación de Ourense que leva dez anos inactivo
A proposta socialista contempla un proceso de selección público, transparente e participativo para elixir os membros do novo comité
Por E.P. | OURENSE | 27/05/2025 | Actualizada ás 18:41
O Grupo Provincial Socialista rexistrou unha iniciativa para reactivar de forma inmediata o Comité Ético da Deputación de Ourense, un órgano inactivo desde fai máis de dez anos.
A moción, que será debatida no pleno ordinario do próximo 30 de maio, busca recuperar un instrumento esencial para a transparencia, a fiscalización e a integridade institucional.
"Non se trata soamente de cumprir cunha obrigación legal, senón tamén de recuperar un símbolo de confianza, de rigor e de compromiso co ben común", afirmou Álvaro Vila, secretario provincial do PSdeG-PSOE.
Na súa intervención, Vila destacou a importancia de contar con "espazos neutros e independentes para resolver conflitos complexos, protexer aos denunciantes e garantir unha contínua fiscalización interna", advertindo que sen estes mecanismos "o risco de deterioración da confianza cidadá elévase exponencialmente".
PROCESO PÚBLICO, INDEPENDENTE E SEN VÍNCULOS POLÍTICO
A proposta socialista contempla un proceso de selección público, transparente e participativo para elixir os membros do novo comité. O criterio de elección basearase no mérito, a experiencia, a independencia e o compromiso co interese xeral, evitando calquera relación directa ou indirecta cos grupos políticos do goberno.
Ademais, exponse a revisión e actualización do marco normativo que regula o Comité Ético, co fin de garantir a súa autonomía funcional e asegurar unha separación real respecto ao poder político.
Outra da medidas clave será a implementación dun sistema de rotación e renovación progresiva dos seus integrantes, para impedir a perpetuación nos cargos e asegurar a continuidade do órgano ante posibles vacantes ou dimisións.
Así mesmo, o PSdeG-PSOE propón dotar ao comité dos recursos humanos, técnicos e xurídicos necesarios para o desenvolvemento eficaz do seu labor, así como apoio administrativo suficiente para garantir a súa operatividade con obxectividade e transparencia.
Como medida final, a iniciativa inclúe a elaboración e publicación dun informe anual coas actividades, decisións e recomendacións do Comité Ético. Este documento será público e permitirá á cidadanía coñecer o labor desenvolvido polo órgano en materia de control e supervisión.
UN ÓRGANO PARALIZADO DESDE 2015
O Comité Ético foi creado en xuño de 2015 baixo a presidencia de Xosé Manuel Baltar, coa intención de converterse nunha peza central da política de transparencia da Deputación. Con todo, o seu funcionamento quedou paralizado ao pouco tempo, tras a dimisión en bloque dos seus membros ante a apertura dun debate por unha denuncia de acoso sexual presentada polo propio grupo socialista.
Aquela crise puxo de manifesto a falta de independencia do comité e a súa debilidade fronte a casos de elevada sensibilidade política. Desde entón, a pesar de diversas promesas de reactivación, o órgano permaneceu inoperativo, deixando o que o PSdeG-PSOE cualifica como un "grave baleiro institucional" nun ámbito fundamental para a credibilidade da administración provincial.
"A sociedade cambiou. A cidadanía demanda máis participación, maior conciencia sobre dereitos laborais, igualdade real e non discriminación, e máis máis esixencias en canto a transparencia e responsabilidade nos postos de poder", concluíu Vila. "Neste contexto, resulta inadmisible que un instrumento tan importante como o Comité Ético siga sen recomporse".
