O PPdeG acusa ao BNG de hipócrita cos eólicos: "Pasan de apoio máximo a bloqueo máximo segundo sopre o vento"
A secretaria xeral do PPdeG, Paula Prado, en declaracións aos medios en Pol, aludiu ás "preocupantes" informacións publicadas esta semana por 'El Debate' sobre o "paso de empresarios a activistas" de diversas persoas vinculadas ao BNG
Por E.P. | LUGO | 28/05/2025 | Actualizada ás 18:41
O Partido Popular de Galicia criticou que o BNG se poña "a un ou outro lado segundo sopre o vento" no que respecta aos eólicos e tachou de "hipócrita" e "cínico" o seu "falso ecoloxismo" despois de "descubrir que membros do BNG do 'non' aos eólicos hai uns anos eran os do 'si' aos eólicos".
A secretaria xeral do PPdeG, Paula Prado, en declaracións aos medios en Pol, aludiu ás "preocupantes" informacións publicadas esta semana por 'El Debate' sobre o "paso de empresarios a activistas" de diversas persoas vinculadas ao BNG e que, na súa opinión, confirman que "o independentismo galego pasa do apoio máximo ao bloqueo máximo segundo crea que lle vai a sacar máis rédito electoral e deixando de lado calquera coherencia ou interese cidadán".
"Creo que, como mínimo, estas informacións requiren explicacións por parte de Ana Pontón e da dirección do BNG", advertiu, antes de remarcar que os dirixentes da formación "xa estaban naquela época" e apelando ao "dano" que estes "falsos ecoloxismos" fan a Galicia como potencia en enerxías renovables.
A número dous dos populares galegos fixo estas declaracións durante a visita que realizou a Pol, xunto á portavoz local do partido e presidenta de Novas Xeracións (NN.XX.), Nicole Grueira, para reivindicar que este concello "necesita máis rigor na xestión e moito máis 'sentidiño' no destino de fondos públicos".
"O PEOR DA MARCA PSOE"
Neste sentido, apuntou que Pol é "un gran exemplo do que ocorre onde non goberna o Partido Popular" e que o seu alcalde "está impregnado do peor de márcaa PSOE", xa que "deixa de lado os problemas máis urxentes do concello para centrarse só nos seus".
"Estamos no concello coa débeda per cápita máis alta de toda a provincia de Lugo (en total, máis de 3,5 millóns de euros) e unha das máis altas de Galicia", denunciou, á vez que afeaba ao rexedor socialista estar "máis centrado no fútbol que nas marcas negativas da súa xestión".
En contraposición a todo isto, a secretaria xeral do PPdeG apuntou a Nicole Grueira como "alternativa" e mostrouse convencida de que, se a líder local do partido fose alcaldesa, "traballaría para todos os seus veciños e veciñas sen sectarismos e sen deixarse influír pola cor política".
UN ALCALDE "CENTRADO SÓ NOS SEUS PROBLEMAS"
Nicole Grueira, pola súa banda, quixo agradecer a presenza de Paula Prado no seu concello para coñecer de primeira man os problemas que sofren os veciños ante a "pasividade" dun alcalde "centrado só nos seus problemas".
"Só ocúpase dos seus caprichos e esquécese do que realmente importa", afirmou a portavoz popular, trasladando demandas veciñais como son a necesidade de arranxar as pistas ou dotar duns servizos "en condicións" ao alumnado do centro de educación infantil e primaria da localidade.
