Dous anos de cárcere por arrincalle parte da orella a outro dunha dentada

A sección cuarta da Audiencia Provincial de Pontevedra condenou a tres acusados de agredirse durante unha pelexa motivada por unha débeda. A un deles impúxolle dous anos de cárcere por cometer un delito de lesións con deformidade en órgano ou membro non principal, pois lle arrincou á vítima un anaco de orella. No seu caso, os maxistrados tiveron en conta a atenuante de reparación do dano, pois consignou antes do xuízo 10.000 euros, os cales practicamente cobren a indemnización de 12.000 euros que debe pagar ao prexudicado, quen á súa vez tamén foi condenado ao pagamento de 600 euros por cometer dous delitos leves de lesións. Por último, os xuíces impuxéronlle á muller do autor do delito de lesións con deformidade unha multa de 180 euros por incorrer nun delito leve de malos tratos de obra. 

O tribunal considera probado que o 4 de setembro de 2023 un dos acusados se presentou na casa dun matrimonio e comezou a insultar ao home e á súa muller con motivo da reclamación dunha débeda. A Sala indica que cando a muller escoitou a discusión, saíu do inmoble, momento no que os tres se encerellaron nunha discusión, durante a cal se agrediron mutuamente. No curso da pelexa, o seu marido mordeulle ao home que acudiu á súa vivenda, o que provocou que perdese un anaco de orella.

A Audiencia, ademais dos puntos nos que converxen as declaracións das vítimas, tivo en conta os informes periciais, que “obxectivan lesións totalmente compatibles” cos feitos declarados acreditados, así como as versións das testemuñas e dos axentes de policía que acudiron ao lugar dos feitos tras a pelexa. A sentenza non é firme, pois cabe presentar recurso de apelación ante o Tribunal Superior de Xustiza de Galicia.