O PPdeG cambiará a Lei galega de Deporte para que a Xunta exerza a acción popular en procedementos por violencia

O Grupo Popular impulsará no Parlamento de Galicia unha proposición de lei para reformar a Lei galega do Deporte co obxectivo de que a Administración poida exercer a acción popular nos procedementos que se sigan por delitos e actos de violencia perpetrados no ámbito deportivo.

Ademais, incluirá medidas para clarificar o réxime de prescricións das infraccións e sancións no ámbito deportivo, así como para profundar no bo goberno no deporte e nas organizacións e federacións galegas.

Nunha rolda de prensa ofrecida este venres no Pazo do Hórreo, o portavoz parlamentario do PPdeG, Alberto Pazos, informou do rexistro desta proposición de lei a través da que, segundo indicou, introdúcense "importantes cambios" na lei aprobada hai 13 anos e que permitirán adaptala á realidade da sociedade actual. "Porque non podemos consentir e pór fin aos actos de violencia deportiva que cada vez están a manchar máis a boa práctica do deporte de Galicia", apuntou.

FOMENTAR VALORES

"O deporte e as competicións deportivas deben fomentar os valores deportivos, a socialización dos participantes e un intercambio de experiencias positivas, e todo isto velando pola seguridade e a protección de deportistas e espectadores, para que a práctica deportiva sexa libre de violencia en calquera das súas formas, tanto física como verbal", indicou.

Con todo, lamentou que están a comprobar como a violencia no deporte empeza a ser algo habitual, polo que considera urxente que se adopten a medidas oportunidade para pór fin a estas prácticas violentas que afectan tanto a deportistas, como árbitros e xuíces, e mesmo ao público asistente aos acontecementos deportivos.

A iniciativa lexislativa modifica a Lei do Deporte existente para clarificar o réxime de prescrición das infraccións e as sancións. Así, fixa tres anos para as infraccións ou sancións por faltas moi graves; dous anos para as infraccións ou sancións por faltas graves; e seis meses para as leves e un ano para as por faltas leves. En último lugar, elévase o nivel de esixencia das normas de bo goberno para as organizacións e federacións deportivas.