O PSdeG aplaude o acordo coa OTAN para evitar a subida do gasto militar

O secretario xeral do PSdeG, José Ramón Gómez Besteiro, celebrou o acordo alcanzado polo Goberno coa OTAN para non subir o gasto militar de España ata o 5% do Produto Interior Bruto (PIB) e tachou de "insolvente" ao líder do PP, Alberto Núñez Feijóo. En rolda de prensa este luns, o socialista valorou positivamente o acordo anunciado este domingo, que considera que é "unha excelente noticia" e que mostra "a firmeza, a contundencia e o protagonismo" de España "no ámbito internacional".

"Unha vez máis, o presidente do Goberno volve marcar principios, política e expoñer o protagonismo de España nunha cuestión tan importante como a discusión sobre os incrementos en política de seguridade e defensa", subliñou. Neste sentido, insistiu en que era unha cuestión na que o Estado "se xogaba moito" e o Executivo central "mantivo a firmeza política e moral" nun tema "tan importante como a discusión sobre o futuro dos investimentos e gastos en materia de defensa". Mentres, lamentou que seguen á espera de coñecer "o criterio do PP" a este respecto. "Se é que o teñen", engadiu o líder do PSdeG, que tamén asegurou que Núñez Feijóo demostrou que é "un líder insolvente".

O NOVO PLAN DE VIVENDA

Doutra banda, Gómez Besteiro reprochou ao PP que anuncien no Senado "unha nova ofensiva ás políticas de vivenda do PSOE". E faino, apuntou o secretario xeral do PSdeG, cando tras a "insistencia" dos socialistas "parece que Rueda acepta por fin sentar a falar do novo Plan de vivenda". Un plan, defendeu Besteiro, que outorgaría a Galicia "380 millóns de euros para vivenda pública" e "unha oportunidade real e verdadeira para miles de familias que viven en condicións precarias".