O paro baixa en 4.387 persoas en xuño en Galicia, un 3,93%

O número de persoas en paro en Galicia baixou en 4.387 en xuño (-3,93%), deixando o total en 107.254 desempregados, segundo datos do Ministerio de Traballo. En comparación co mesmo mes do ano pasado, hai 10.684 parados menos (-9,06%). Por provincias, os maiores descensos déronse en Pontevedra (-1.859) e A Coruña (-1.585), seguidas por Ourense (-564) e Lugo (-379).

Por sectores, a caída do desemprego concentrouse nos servizos (-3.251 persoas), seguida pola industria (-373), construción (-178), agricultura (-146) e o colectivo sen emprego anterior (-439). Entre a poboación estranxeira, o número de desempregados en Galicia situouse en 9.719, 632 menos que en maio.

En xuño asináronse 72.605 contratos na comunidade, o que supón un aumento do 16,88% respecto ao mes anterior. Deles, 20.640 foron indefinidos (+10,4%) e 51.965 temporais (+19,83%). No acumulado anual, os contratos indefinidos representan o 32,62%. A taxa de cobertura por desemprego situouse no 74,4%, con 65.246 galegos beneficiarios e un gasto total en prestacións de 86,45 millóns de euros (datos de maio).

A nivel estatal, o paro tamén caeu en xuño, con 48.920 persoas menos nas listas do SEPE, ata un total de 2.405.963 desempregados, a cifra máis baixa nun mes de xuño desde 2008. O sector servizos liderou a redución, seguido pola industria e a construción. A caída foi maior entre as mulleres, cun mínimo de paro feminino tamén desde 2008, e entre os menores de 25 anos, que marcan un mínimo histórico con 166.707 desempregados.

SEGURIDADE SOCIAL

A Seguridade Social gañou unha media de 7.844 cotizantes en xuño en Galicia respecto ao mes anterior (+0,72%), de modo que situou o total en 1.102.651 afiliados, segundo os datos que publica este mércores o Ministerio de Inclusión, Seguridade Social e Migracións. Son 17.780 persoas máis dadas de alta na Seguridade Social na comunidade galega que no mesmo mes do ano pasado, o que representa un aumento do 1,64%.

Por réximes, os cotizantes galegos repártense entre o xeneral, con 879.662 afiliados, 205.113 que son autónoos e 17.875 traballadores do mar.

SINDICATOS

Pola súa banda, a CIG destaca que os datos do paro rexistrado correspondentes ao mes de xuño mostran un mercado laboral "cada vez máis precario e dependente do sector servizos". AUXT avisa de que "non se pode caer na autocompracencia" xa que "aínda hai demasiadas persoas que queren traballar e non poden facelo". Noutro comunicado de prensa, CC.OO. alerta de que o desemprego cae en xuño "pero seis de cada 10 contratos seguen sendo temporais".