O TSXG recoñece o dereito dunha traballadora do Sergas ao permiso de lactación

A sala do Contencioso Administrativo do Tribunal Superior de Xustiza de Galicia (TSXG) recoñeceu o dereito dunha traballadora do Servizo Galego de Saúde (Sergas) a gozar do permiso retribuído de lactación tras pedir unha excendencia. En concreto, nunha sentenza con data do pasado dous de xullo e á que tivo acceso Europa Press, a sala estima un recurso de apelación interposto polos servizos xurídicos da CIG contra a decisión do Sergas que limitou a 95 horas o permiso concedido a unha profesional da sanidade pública, cando esta solicitara un total de 150 horas.

Respecto diso, nun comunicado, o sindicato sinala que o fallo xudicial reforza que o permiso de lactación non pode verse condicionado por cuestións administrativas, como defende a CIG, que anima ás mulleres ás que se lles rexeitou este permiso a que presenten denuncia. Deste xeito, o TSXG revoga a sentenza de primeira instancia e anula a resolución administrativa do Sergas, recoñecendo de forma expresa que o permiso de lactación acumulado é compatible co posterior goce dunha excedencia para o coidado.

A sala sinala que este tipo de permisos gozan dunha dimensión constitucional, pois afectan directamente á protección da familia e á conciliación da vida persoal e laboral, dereitos recollidos na Constitución española e nas directivas europeas. Segundo o TSXG o dereito ao permiso de lactación non pode verse condicionado pola prestación efectiva de servizos nin ser reducido proporcionalmente en función dunha excedencia solicitada con posterioridade.

Deste xeito, o fallo reafirma que a finalidade destes permisos é facilitar o coidado do menor, e que limitar ou minorizar este dereito por razóns administrativas contradí os principios de protección á infancia e igualdade. A CIG destacou que esta resolución supón un importante precedente para o persoal das administracións públicas que combine diferentes medidas de conciliación, e consolida a interpretación máis garantista dos dereitos laborais vinculados ao coidado de menores.

Exterior do edificio do Tribunal Superior de Xustiza de Galicia (A Coruña) | Fonte: Europa Press