OPINIÓN.- A primeira reserva mariña de Lugo e a única de Galicia polas súas características

O medio ambiente é o contraste paisaxístico son dous dos elementos que definen a provincia. Non podemos esquecer que Lugo ten preto de 10.000 quilómetros cadrados de superficie. Esta riqueza natural está avalada polas tres Reservas da Biosfera declaradas pola UNESCO, que representan máis do 55% do territorio: Ancares, Terras do Miño e río Eo-Oscos-Terras de Burón...

Por Galicia Confidencial | Galicia | 03/03/2009

Asimesmo, os cidadáns debemos ser conscientes de que o medio ambiente non só conleva custes, senón que é unha oportunidade económica. Supón unha vantaxa competitiva ó mellorar a percepción dos consumidores, e aporta valor engadido e diferenciador do produto. Incluso pode ter beneficios a máis curto prazo, como o aforro dos custes enerxéticos.

Baixo estas dúas premisas, desde a Deputación apoiaremos a declaración da Reserva Mariña de Interés Pesqueiro da provincia de Lugo, entre as rías de Viveiro e O Barqueiro, que será a primeira Reserva da costa de Lugo e a única de augas interiores e exteriores de Galicia.

Todos os grupos políticos aprobamos por unanimidade a moción do PSOE, impulsada polo Presidente da Deputación, José Ramón Gómez Besteiro, na que se solicitaba o apoio da Instititución provincial á creación desta Reserva. Deste xeito, quixemos respaldar desde o primeiro momento a iniciativa que partiu da Confraría de Pescadores de Celeiro, organización que está a traballar conxuntamente coa Consellería de Pesca, o Ministerio de Medio Ambiente, Medio Rural e Mariño, e a Confraría do Vicedo para a obtención desta distinción.

Neste senso, prestaremos apoio socio-económico para poder levar a cabo accións conxuntas que se irán desenvolvendo a medida que avance este proxecto da franxa costeira luguesa. O Estado e a Xunta compartirán a xestión desta Reserva Mariña.

Entre os obxectivos que se perseguen con esta declaración destaca a protección da rexeración dos recursos pesqueiros, o impulso da pesca e o desenvolvemento sostible, a conservación da flora e a fauna do medio mariñano e a súa diversidade, o fomento da sensibilización medioambiental sobre o mar, a divulgación dos valores pesqueiros e ambientais da costa galega, e a creación de estudos científicos sobre as medidas de protección dos recursos e a xestións das pequerías.

Con esta iniciativa contribuímos a poñer en valor esta zona de Lugo que atesoura enclaves naturais de inigualable beleza. Asimesmo, favoreceremos o aumento de investimentos na provincia e, por tanto, crearemos novas oportunidades de emprego para os veciños e as veciñas da Mariña e do resto de Lugo.