Galicia aumenta máis dun 20% as compensacións aos concellos pola recollida de pilas
O novo convenio cos Scraps eleva a compensación a 590 euros por tonelada, con incrementos previstos ata 2028.
Por Europa Press / Redacción | Santiago de Compostela | 21/07/2025 | Actualizada ás 14:48
A conselleira de Medio Ambiente e Cambio Climático, Ángeles Vázquez, destacou que o novo convenio asinado cos Sistemas Colectivos de Responsabilidade Ampliada do Produtor (Scraps) para a recollida de pilas e acumuladores portátiles en Galicia suporá un incremento de máis dun 20 por cento as compensacións para os concellos adheridos.
En concreto, as entidades locais que se encarguen da recollida selectiva destes residuos e responsabilícense da súa xestión e financiamento recibirán este ano unha compensación duns 590 euros por tonelada, fronte aos 490 que contemplaba o anterior convenio. Ademais, tal e como destacou a conselleira tras a firma, celebrada este luns en Santiago, este incremento "pode alcanzar ata case un 24 por cento" no 2028, último ano de vixencia do novo acordo.
Ángeles Vázquez, acompañada no acto pola directora xeral de Calidade Ambiental e Sostibilidade, María José Echevarría, chamou aos concellos galegos a sumarse a esta iniciativa a partir deste martes, a través da plataforma 'SIRGA'. De feito, se se adhiren antes do 30 de setembro, os beneficios económicos "terán carácter retroactivo", é dicir, aplicarase o aumento da compensación desde o 1 de xaneiro de 2025.
En concreto, o convenio marco asinárono a Consellería de Medio Ambiente e Cambio Climático e catro do seis Scraps que hai actualmente: ECOPILAS, ERP-PILAS, ECOLEC e UNIBAT.
