Galicia aproba un proxecto que prohibe a venda de bebidas enerxéticas a menores
A norma prohibirá a venda de vapeadores e bebidas enerxéticas a menores, co obxectivo de entrar en vigor antes de fin de ano.
Por Europa Press / Redacción | Santiago de Compostela | 28/07/2025 | Actualizada ás 14:32
O Consello da Xunta aprobou este luns o proxecto de lei de protección da saúde dos menores e prevención de condutas aditivas, que agora remite ao Parlamento de Galicia para a súa aprobación definitiva, un texto que prohibe a venda de vapeadores e bebidas enerxéticas a menores. Así o avanzou o presidente da Xunta, Alfonso Rueda, que destacou que a previsión é que a norma poida ser aprobada pola Cámara para que entre en vigor antes de que finalice o ano.
Entre outras cuestións, esta norma equipara as bebidas enerxéticas co alcol e os vapeadores ao tabaco. Por tanto, ningún destes produtos poderán venderse aos menores de idade en Galicia, que se converterá na primeira comunidade en regular e prohibir a venda e consumo destes produtos entre os menores de idade. Ademais, o texto reforzará a capacidade dos poderes públicos para tomar medidas fronte a fenómenos como o botellón.
AMPLÍA A PROHIBICIÓN DE FUMAR
O proxecto de lei prohibe a venda de cigarros electrónicos a menores e amplía a prohibición de fumar aos accesos dos centros da administración pública, centros educativos e sanitarios, nos que non se permite fumar nun radio de 50 metros. Ademais, para reducir o número de fumadores pasivos, "tampouco estará permitido fumar nas marquesiñas de transporte público nin nas piscinas de uso público", indicou o conselleiro.
RISCOS DAS BEBIDAS ENERXÉTICAS
A Xunta sinala que as bebidas enerxéticas que contén 32 mg ou máis de cafeína por cada 100 ml e outros ingredientes estimulantes equivalen a beber tres cafés, o que se considera excesivo para menores. Así, apunta que, en adolescentes, inxestas superiores a 60 mg poden afectar o soño e, a partir de 160 mg, poden xurdir alteracións psicolóxicas e de comportamentos, ademais de trastornos cardiovasculares.
Por este motivo, Galicia será pioneira a nivel nacional na súa prohibición de venda e consumo por parte de menores, unha medida que tomaron países europeos como Polonia e Letonia. Para contribuír á concienciación social sobre o contido destas bebidas, os establecementos deberán situalas nun espazo separado con respecto aos refrescos, indicou Gómez Caamaño.
