Arde un buque no porto de Ribeira e un amplo dispositivo trata de sufocar o lume

O buque Awadi, de 50,75 metros de eslora e 10,32 metros de manga, arde no porto de Ribeira desde preto das 17.00 horas da tarde do luns. Un amplo dispositivo, activo durante toda a tarde, trata de sufocar as chamas.

Segundo a información dispoñible, trasladada polo 112 Galicia, o lume orixinouse na sala de máquinas mentres se realizaban tarefas de reparación. Polo momento, ningunha persoa resultou afectada e os esforzos céntranse unicamente na extinción do incendio. O Centro Integrado de Atención ás Emerxencias (CIAE) recibiu o aviso ás 16.45 horas a través da chamada dun particular que alertou da presenza de fume e chamas na embarcación.

De inmediato, desde o centro de coordinación mobilizáronse aos Bombeiros de Ribeira e de Boiro, o GAEM de Ribeira, Salvamento Marítimo, Gardacostas de Galicia e Portos de Galicia, así como axentes da Garda Civil, da Policía Local e efectivos de Protección Civil.

Pola súa banda, a Capitanía Marítima de Vilagarcía de Arousa desprazou por conta propia o Buque María Pita, con base en Vigo, para prestar axuda no caso de que fose necesaria. Na actualidade, todos os equipos despregados continúan traballando para sufocar o lume e garantir a seguridade na zona portuaria.

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Galicia Confidencial (@galicia_confidencial)