'Los Suaves' anuncian que o seu concerto de despedida será en Ourense o 17 de decembro

O grupo de rock 'Los Suaves' anunciou este mércores que a súa despedida dos escenarios se producirá este 17 de decembro en Ourense cun grande concerto titulado "O xuízo final". Será o colofón a unha semana de actividades programadas para poñer fin aos 36 anos de carreira musical dun dos grupos de referencia do rock nacional.

Os integrantes do mítico grupo de rock ourensano, Yosi Domínguez (cantante), Carlos Domínguez (baixo), Alberto Cereijo (guitarra), Fernando Calvo (guitarra) e Tino Mojón (batería), desvelaron no edificio cultural "Marcos Valcárcel" da Deputación de Ourense, algunhas das claves da que será a última ocasión para poder velos actuar en directo.

A cita será en Expourense e as entradas poranse á venda a partir das 10,00 horas do próximo martes, 5 de xullo, na páxina web 'www.lossuavesweb.com'. Entre os poucos detalles que os músicos quixeron desvelar do seu adeus á música destacan que está prevista unha gravación do concerto e que "días antes" haberá diversas actividades.

UNHA SEMANA DE ACTIVIDADES PREVIAS

"Temos moitas ideas para esa semana", confirmou o guitarrista do grupo Alberto Cereijo, que foi o encargado de dar a coñecer algunhas destas propostas. Entre elas salientou a convocatoria dun concurso, organizado en colaboración coa Radio Galega, para escoller bandas ourensanas e galegas que compartan o escenario cos 'Suaves.

Ademais, sinalou que "o día anterior" haberá "concertos pola cidade" e "cousas pola rúa", se ben non quixo aclarar nada máis o que vai ser esa semana de celebración debido a que "faltan case seis meses".

Pola súa banda, o baixista do grupo, Charly Domínguez, afirmou que este último concerto "será un espectáculo inesquecible dentro do que é a historia dos 'Suaves. "Faremos o que nunca fixemos, porque será o último concerto do grupo", dixo.

"Temos a sorte de nacer en Ourense", sinalou ao inicio da súa intervención un emocionado Yosi, que agradeceu á xente de Ourense o apoio á banda porque "sen eles non alcanzariamos 36 anos de carreira musical".

Yosi botou man ao humor para explicar os motivos da súa decisión de abandonar os escenarios. "Déixoo porque Prince morreu, Bowie morreu, Lenny morreu e eu, a verdade, é que non me atopo moi ben", dixo entre risas.

Non obstante a continuación confirmou que ten previsto manter unha vinculación co mundo da música. Así, sinalou que "sempre" lle gustou "escribir para outros" e que espera continuar escribindo. "Creo que nunca abandonarei a historia da música, despois de tantos anos", dixo ao respecto.

O que confirmou é aceptar a proposta da Deputación de Ourense para escribir un libro sobre a historia do grupo. "Tiña propostas con outras editoriais, pero rexeiteinas para publicar coa Deputación", dixo.

BALTAR CONVENCIDO DE QUE SERÁ UN CONCERTO "MÍTICO"

Pola súa banda, o presidente da Deputación de Ourense, Manuel Baltar, agradeceu que o grupo aceptara a proposta do ente provincial para realizar a súa última actuación na provincia, o que fará que "o 17 de decembro sexa esa noite que nunca se remata" e que "marcará un antes e un despois na historia de Ourense".

Baltar reiterou o seu desexo de que ese peche de 36 anos de carreira sexa "mítico" para "estes ourensanos que fixeron tanto pola música e pola proxección da imaxe de Ourense".

O grupo ourensano iniciou en marzo de 2015 a súa xira de despedida, que se prolongará ata finais de 2016 con concertos en España e no estranxeiro.