Diego Calvo e Monbús negocian unha solución á falta de prazas para universitarios que van a Santiago
"Hai máis demanda do que se esperaba", explicou o conselleiro que, por outra banda, considera adecuada a oferta de conexión coa Coruña
Por E.P. | LUGO | 19/09/2025 | Actualizada ás 13:18
O conselleiro de Presidencia, Xustiza e Deportes, Diego Calvo, explicou que a Xunta está a negociar coa empresa de autobuses concesionaria da liña que une Lugo con Santiago de Compostela, Monbus, para "ver se é necesario reforzar as prazas dispoñibles agora que hai máis demanda do que se espera".
O responsable de mobilidade fixo estas declaracións durante unha visita á futura estación intermodal de Lugo, onde contestou as protestas do colectivo de estudantes usuario do servizo de bus os fins de semana, que se queixa da falta de prazas en varias das liñas, especialmente os venres e os domingos pola tarde. "Espero que en pouco tempo podamos ter unha solución", concluíu.
En referencia á conexión de Lugo coa Coruña, Calvo lembrou que hai sete liñas de autobuses nun sentido e cinco no outro os fins de semana, "precisamente en atención ao fluxo de estudantes universitarios" e cre que actualmente nesta conexión está "adaptada a oferta e a demanda".
