O Sergas convocará 27 novas prazas de fisioterapia para reforzar a atención sanitaria

O xerente do Servizo Galego de Saúde, José Ramón Parada, anunciou este sábado que o Diario Oficial de Galicia publicará en breve a convocatoria de 27 novas prazas estatutarias de fisioterapia. O obxectivo, dixo, é consolidar un cadro de profesionais "máis numeroso, estable e capaz de responder aos retos asistenciais actuais".

Segundo explicou Parada na inauguración da IV Xornada da Asociación Científica de Fisioterapeutas de Galicia, a convocatoria reunirá as prazas incluídas nas ofertas de emprego público de 2024 e 2025.

Na súa intervención, o xerente destacou que a dor crónica é "un dos grandes retos sanitarios, sociais e económicos do século XXI". Subliñou que o Sergas ten a responsabilidade de artellar unha resposta "organizada, multidisciplinar e centrada na persoa", na que a fisioterapia debe desempeñar un papel esencial.

Parada insistiu en que os fisioterapeutas son "imprescindibles" porque traballan con obxectivos de movemento, forza, mobilidade e ergonomía, pero tamén pola súa proximidade ao paciente, o seguimento continuado e a capacidade para fomentar cambios no estilo de vida.