BNG denuncia exclusión do galego nunha campaña pesqueira financiada polo Estado

O deputado nacionalista Néstor Rego denunciou que a campaña, presentada en agosto e difundida amplamente en vilas e cidades galegas, constitúe unha "clamorosa vulneración dos dereitos lingüísticos da cidadanía galega" e unha "falta de respecto institucional". Rego pediu que o Goberno faga unha avaliación crítica da exclusión do galego e lembrou que "unha campaña financiada con fondos públicos non pode ignorar as linguas distintas do español".

O BNG solicitou explicacións ao Ministerio sobre se tiña coñecemento de que a campaña se faría unicamente en castelán e por que non se deron instrucións claras para garantir o respecto polo galego. "Non é comprensible que se pretenda sensibilizar á poboación galega sobre estas especies sen utilizar a lingua propia do país", advertiu o deputado, que instou ao Executivo a asumir a súa responsabilidade.

Ademais, o BNG pediu que se adopten medidas inmediatas para corrixir esta situación e evitar que se repita noutras accións comunicativas. "Aínda se está a tempo de rectificar esta discriminación lingüística. O Goberno debe demostrar con feitos o seu compromiso co galego e coas demais linguas oficiais do Estado", concluíu Rego.