Confirmada a condena de 6 anos e medio a unha enfermeira que accedeu ao historial dunha nai e o seu fillo
Por Europa Press / Redacción | SANTIAGO DE COMPOSTELA | 14/10/2025 | Actualizada ás 18:05
A Sala do Civil e Penal do Tribunal Superior de Xustiza de Galicia (TSXG) confirmou a sentenza da sección sexta da Audiencia Provincial da Coruña na que condenou a seis anos e medio de prisión a unha enfermeira do Servizo Galego de Saúde (Sergas) por acceder, sen o seu consentimento, á historia clínica da nai dun compañeiro de colexio do seu fillo e á do menor.
Así, os maxistrados desestiman o recurso de apelación presentado pola defensa da acusada, que alegou vulneración da presunción de inocencia, erro na valoración da proba e desproporción da pena imposta.
Con todo, a Sala rexeita as alegacións da recorrente e subliña que está "perfectamente acreditado" e que "resulta indiscutible" que realizou os accesos.
Sobre a desproporción da pena, destaca que "tal situación non procede do criterio da sala de instancia, que xa expresa que aplica a penalidade mínima, senón do previsto no Código Penal para o delito en cuestión cando se comete por persoa que ten a condición de funcionario público". O fallo non é firme, xa que se pode recorrer ante o Tribunal Supremo.
