O BNG reclama á Xunta toda a documentación sobre as residencias de maiores
Unha "ausencia de explicacións" que Tabarés considera unha "falta de respecto ao Parlamento" e ao "sistema democrático"
Por Europa Press / Redacción | SANTIAGO DE COMPOSTELA | 17/10/2025 | Actualizada ás 14:01
O deputado do BNG Iago Tabarés instou á Xunta a trasladar as actas, informes e expedientes sancionadores das residencias de maiores, despois de que inspección detectase "graves deficiencias" nunha vivenda comunitaria de Amoeiro e noutra de Xinzo de Limia.
En rolda de prensa este venres, o parlamentario nacionalista mostrou a súa "indignación" ante a "falta de resposta do presidente da Xunta" no Pleno desta semana sobre a situación vivida nestes centros de maiores.
Unha "ausencia de explicacións" que Tabarés considera unha "falta de respecto ao Parlamento" e ao "sistema democrático". Ademais, afirmou que esa "falta de resposta" evidencia que a Xunta "coñecía e consentiu o que ocorría nesa vivenda", polo que cuestionou se "estará a ocorrer noutras vivendas comunitarias" de Galicia.
Segundo o deputado do Bloque, Alfonso Rueda é "consciente da ineficacia, ausencia de control e falta de responsabilidade" da conselleira Fabiola García para "velar polo benestar das persoas residentes", así como para "controlar o benestar, as condicións de traballo das persoas que desenvolven o seu labor nestas residencias e centros", algo que cualificou como "cinismo político".
"Rueda escusouse na inspección de traballo cando é perfectamente coñecedor de que a inspección carece de medios e instrumentos eficaces para poder desenvolver o seu labor", criticou.
VISITAS INSPECCIÓN
Neste sentido, Tabarés lembrou que hai dous anos a Asociación Galega de Inspectores de Servizos Sociais expresaron nun comunicado que a conselleira "obstaculizaba as inspeccións en residencias", baseándose en "denuncias realizadas por traballadores" e que a Xunta "coñecía".
"E ante esta denuncia de obstaculización por parte da conselleira, que fixo a Xunta? Ver se o sistema permitía que as inspeccións fosen avisadas, se existía un mecanismo que permitía que os centros coñecesen que ían ir os inspectores e puidesen esconder as súas deficiencias?, cuestionou antes de sinalar que a Administración autonómica "non fixo nada", senón que "iniciou actuacións contra a asociación de inspectores denunciantes, en lugar de investigar eses feitos".
Así mesmo, reclamou a "eliminación da precariedade", así como un "incremento do cadro de persoal de inspección en servizos sociais de Galicia e establecer un sistema que impida que as visitas de inspección poidan ser avisadas".
AMOEIRO E XINZO
Nesta liña, Iago Tabarés esixiu as actas e informes das inspeccións realizadas en Amoeiro e en Xinzo, así como doutros centros xestionados polas mesmas entidades.
Os nacionalistas queren saber se houbo inspeccións e cal foi o resultado, xa que ven "sorprendente" que a vivenda comunitaria de Amoeiro fose inspeccionada o 8 de setembro e "seguiu funcionando con normalidade" ata "unha denuncia ante a Garda Civil dun familiar", cando se decretou o peche o 1 de outubro por "infraccións graves".
"Cremos que é moi importante saber o resultado desa inspección, como tamén entendemos que é importante coñecer se esa vivenda foi inspeccionada nos últimos anos e cal foi o resultado e despois cal foi a actuación da Xunta. Entendemos que iso é algo que merece ser explicado e non como ocorreu no pasado pleno", aseverou.
Neste contexto, o deputado do BNG insistiu en que "non se pode seguir xogando co benestar das persoas maiores" e apelou a "respectar o dereito a unha vellez digna".
Agora, sinalou que esperan explicacións, examinar a documentación que se lles traslade e, no seu caso, valorar unha segunda fase de acción, pero nestes momentos reiterou que necesitan "coñecer e certificar" todo o ocorrido.
