Abre ao tráfico a autovía da Costa da Morte entre Carballo e Baio, oito anos despois do inicio das obras
Feijóo avanza que este ano se contratará o proxecto de construción ata Vimianzo e destaca que a vía mellorará a vertebración de Galicia
SANTIAGO DE COMPOSTELA | 29/07/2016 | Actualizada ás 17:51 por EUROPA PRESS
A autovía da Costa da Morte foi aberta ao tráfico este venres tras un acto ao que asistiu o presidente da Xunta, Alberto Núñez Feijóo, quen destacou que esta infraestrutura non só une as localidades de Carballo e Baio, no Concello de Zas (A Coruña), senón que "mellorará a calidade de vida e benestar de toda a bisbarra".
No ano 2008, o por aquel entón presidente da Xunta, Emilio Pérez Touriño, colocou a primeira pedra dun proxecto que pretendía comunicar a autoestrada da Coruña-Carballo, con esta autovía que estaba proxectada para enlazar con Cee e Fisterra ao longo de máis de 40 quilómetros. Sen embargo, na actualidade abriuse ao público un tramo de 27 quilómetros dende Carballo a Baio.
Neste sentido, Feijóo avanzou durante o acto de inauguración a contratación "este mesmo ano" do proxecto de construción que permitirá a prolongación da autovía ata o Concello de Vimianzo, para "dende aí, enlazar con outros lugares como o municipio de Camariñas".
Así mesmo, sinalou que "para chegar a Fisterra fai falta chegar primeiro a Baio". "Niso estamos", agregou Feijóo. Polo momento, segundo destacou o mandatario galego, hai 27 quilómetros libres de peaxe nos que se transcorre por cinco concellos que quedan á súa vez "vertebrados".
APOSTA DO GOBERNO
O presuposto final foi de 170 millóns de euros e, segundo os datos ofrecidos pola Xunta nun comunicado, serán 120.000 os veciños que comezarán a beneficiarse desta infraestrutura. Ademais, Feijóo asegurou que esta autovía é unha referencia da aposta do Goberno galego por avanzar na vertebración da Comunidade.
Por outro lado, recordou que "a pesar de estar nun contexto de estreitezas económicas", a rede autonómica de vías de alta capacidade creceu un 66% nos últimos oito anos, polo que cando remate o ano o 80% da poboación estará a "menos de 15 minutos dunha vía de alta capacidade".
O presidente tamén apuntou a que a Xunta conxelou as taxas das autoestradas de peaxe autonómicas e tamén reduciu os custos para os usuarios que as usan habitualmente. Desta forma, segundo indicou, as peaxes das dúas autoestradas propiedade da Comunidade convertéronse nas "máis baratas de España".
