Máis de 70.000 sinaturas para construír un refuxio para cans abandonados no Camiño de Santiago

Máis de 70.000 persoas asinaron a iniciativa da Asociación Protectora de Animais do Camiño de Santiago (APACA) na plataforma change.org, na que pide apoio para construír un refuxio que acolla os cans abandonados no Camiño de Santiago.

Cans abandonados | Fonte: Europa Press.

A petición será entregada ao concello coruñés de Arzúa -onde a asociación exerce o seu labor- e á conselleira de Medio da Xunta de Galicia, Beatriz Mato, co obxectivo de que garantan un traballo de colaboración entre as institucións e APACA para constituír un refuxio "debidamente acondicionado, onde poder cobixar e atender estes animais".

Segundo denuncia APACA, o Camiño de Santiago, patrimonio da Unesco, ten "unha cara oculta que poucos coñecen pero que a todos desagrada" e é a historia do abandono animal. "Cada día, máis e máis cans son abandonados no Camiño, e este problema necesita unha solución urxente", denunciou.

Neste sentido, a ONG explicou que é unha protectora sen ánimo de lucro, que se mantén con escasos recursos propios xa que non ten "ningún tipo" de apoio institucional. "Necesitamos axuda porque a nosa capacidade se desborda", asegurou, para despois denunciar que cada día aumenta a cantidade de cans que teñen que atender.

"Estes animais ás veces son directamente abandonados e outras sinxelamente desituados. Isto último débese ás prácticas habituais dalgúns peregrinos que, supoñemos inconscientemente, permiten que os cans os sigan na súa andanza para deixalos despois abandonados en pobos moi distantes da súa orixe. Os cans quedan desorientados, famentos e sen fogar", relatou.

Por último, apuntou que en moitos casos os cans non teñen chips de identificación porque, segundo indicou APACA, se reproducen entre as aldeas. "O problema agrávase aínda máis e traspasa a fronteira de Arzúa", remachou.