Empresarios de Pontevedra volven reclamar a variante de Cerdedo e a saída sur ferroviaria dende Vigo

A Confederación de Empresarios de Pontevedra (CEP) volveu reivindicar a entrada da AVE en Vigo a través de Cerdedo, no chamado trazado en 'L', así como a saída sur dende a cidade olívica, para dar continuidade á comunicación ferroviaria cara á fronteira con Portugal.

A través dun comunicado, a patronal pontevedresa subliñou que a mellora das conexións por ferrocarril con Portugal "é aínda unha materia pendente", e sinalou que é "imprescindible" que os gobernos español e luso consideren a eurorregión "como un territorio único" dende o punto de vista das infraestruturas".

Por iso, reclaman un tren "de altas prestacións" para vertebrar ese territorio e piden recuperar a idea do "metrotren" que conecte os principais núcleos empresariais e loxísticos con ese eixe A Coruña-Lisboa.

Ademais, recordan que esa proposta "resolvería o problema que supón manter o trazado actual polo centro de O Porriño", onde o pasado 9 de setembro descarrilou un tren, deixando 4 falecidos e 49 feridos.