O Museo de Pontevedra acolle unha xornada de visibilización da "imparable" muller emprendedora

O Sexto Edificio do Museo de Pontevedra celebrará o próximo 22 de outubro o terceiro 'Encontro Imparable' da rede profesional #MujeresImparables, que persegue a visibilización das emprendedoras a nivel nacional e que acolle por primeira vez a provincia de Pontevedra. A xornada está organizada polo Servizo de Igualdade da Deputación de Pontevedra.

A presidenta provincial, Carmela Silva, presentou este xoves esta iniciativa acompañada pola deputada Isaura Abelairas, asegurando que a Deputación se está a converter nun referente en Igualdade en toda Europa. "Algo que me enche de orgullo como presidenta desta institución", apostilou.

O terceiro 'Encontro Imparable', despois das anteriores citas de Xerez e Sevilla, "será un evento moi fresco e dinámico, que aposta polo networking e polas conferencias curtas" nas que mulleres emprendedoras de relevancia nacional, así como mulleres galegas con iniciativas profesionais interesantes e innovadoras, falarán das súas experiencias.

Un dos obxectivos da xornada é a visibilización do liderado da muller profesional, así como a suma de sinerxías e o establecemento de novas vías de cooperación "non só entre mulleres, senón entre mulleres e homes líderes, xa que a Igualdade afecta a todas as persoas", explicou Silva.

Están previstos os relatorios da directora da área de Centros da Axencia de Innovación da Xunta de Galicia, Sonia Pazos Álvarez; da comunicadora e actriz Nieves Rodríguez; da fundadora de Emotivación e coach profesional Patricia Rodríguez; da xornalista e asesora de comunicación Carla Reyes Uschinsky; e da xerente da Rede Museística Provincial de Lugo, Encarna Lago.

O evento tamén acollerá diversos talleres, nos que as asistentas, por grupos, deberán idear un proxecto de empresa ou reconstruír a historia dunha muller "imparable" e emprendedora.

PREMIOS SOFÍA NOVOA ORTIZ

Ademais, a presidenta da Deputación de Pontevedra presentou este xoves a primeira edición dos 'Premios Sofía Novoa Ortiz' á Inclusión da Perspectiva de Xénero nos Traballos de Fin de Grao e de Fin de Máster, convocado pola institución provincial.

A convocatoria está aberta ao alumnado da Universidade de Vigo e trátase dun recoñecemento público "a unha muller modelo que se ten que converter nun referente", dixo Silva.