Descuberta nova escultura do Pórtico da Gloria do Mestre Mateo na Catedral
Mide máis de 1,80 cm e estaba oculta e enterrada nos alicerces da Catedral de Santiago. A intención da Igrexa é dala a coñecer nunha exposición en Madrid.
Por Galicia Confidencial | Santiago de Compostela | 21/10/2016 | Actualizada ás 14:38
A Fundación Catedral de Santiago presentou esta mañá o descubrimento dunha nova obra do Mestre Mateo. Trátase dunha estatua-columna duns 1,85 metros de alto. É unha figura descalza, sen ás, probablemente un apóstolo.
Segundo explicou Daniel Lorenzo, director da Fundación, apareceu na torre sur do templo, durante os actuais traballos de restauración. O descubrimento, ademais do seu indudábel valor histórico, ten certo misterio. A escultura estaba oculta e enterrada nun pequeno espazo da base desta parte da Catedral de Santiago.
Os expertos aseguran que pode ser do período de entre 1200 e 1215. A hipótese máis probábel é que proveña da desaparecida fachada do Pórtico da Gloria na época medieval.
A peza está completa salvo a cabeza. Unha posíbel explicación é que durante algunha obra posterior alguén desbotase esa peza. O común daquela era decapitar as estatuas que se retiraban. A Fundación cree que foi depositada onde apareceu ao redor do século XVI.
Daniel Lorenzo asegura que a peza será presentada publicamente o próximo mes. En concreto, o 28 de novembro, nunha exposición fóra de Galicia, no Museo do Padro en Madrid, que xa tiña programa unha mostra sobre o Mestre Mateo, figura clave para entender a escultura daquel período. Lorenzo explicou en rolda de prensa que a peza permitirá un mellor coñecemento de como a Catedral de Santiago rematou tendo o seu aspecto actual.
Segundo explica Historia de Galicia nun artigo sobre as pezas perdidas do famoso escultor, o Pórtico da Gloria non foi a única gran obra do Mestre Mateo e da súa escola. As magníficas esculturas que adornan a entrada principal da Catedral de Santiago, e que agora están sendo obxecto dunha minuciosa restauración, teñen irmáns e irmás espallados por distintos puntos de Galicia. Un patrimonio riquísimo que se foi perdendo ao longo de centos de anos e que hoxe reaparece dando unha sorpresa maiúscula.
