Feijóo saúda que o PSOE "acepte o resultado" e apela a sumar "grandes maiorías" para afrontar "grandes retos"

O presidente da Xunta en funcións e xefe de filas do PPdeG, Alberto Núñez Feijóo, saudou a "responsabilidade" do PSOE ao "aceptar o resultado das urnas", unha cuestión "de enorme hixiene democrática" que, por outra parte, considerou "esixible calquera partido". Máxime, recalcou, o que máis tempo gobernou España"

"Non podiamos entender que non aceptase o resultado tan contundente que se produciu en decembro e, aínda máis, en xuño", resaltou Feijóo ao ser preguntado polos xornalistas sobre a decisión do Comité Federal do PSOE de absterse na segunda votación da investidura de Mariano Rajoy.

Máis alá dese acto de "responsabilidade" que supón a "normalidade democrática" de "aceptar o resultado das urnas" e permitir a reedición do goberno de Rajoy, unha idea na que abundou, o mandatario autonómico en funcións puxo en valor a "responsabilidade" do seu partido ao aceptar "gobernar en minoría".

Así é que, tras recordar que España ten "materias pendentes que necesitan o apoio de maiorías", fixo votos por que se logren "grandes maiorías" que permitan afrontar "os grandes retos sociais e económicos" que ten por diante o país.

Estas declaracións de Feijóo tras visitar o novo centro de saúde da localidade pontevedresa de Marín víronse interrompidas polos berros dunha muller, que non dubidou en exclamar que "o que vota ao PP non ten responsabilidade".