Por Galicia Confidencial | Ourense | 08/11/2016 | Actualizada ás 09:15
O gravísimo accidente que sufriu Yosi o pasado 23 de xullo en Santander impedirá ao grupo Los Suaves despedirse en Ourense, a súa cidade natal, tal e como terían desexado e tiñan anunciado desde hai meses.
O cantante aínda se está a recuperar das lesións sufridas e non está ao “100%” para poder subir, de novo, aos escenarios, tal e como informou o grupo a través dun comunicado. Por iso, víronse na obriga de cancelar o chamado Concerto de Despedida, previsto para o vindiero 17 de decembro no Espazo ExpOurense.
“Só os médicos poderán dicir cando estará reposto totalmente, despois de estar ingresado nos Hospitais de Valdecilla e CHOU de Ourense hoxe atópase en tratamento de rehabilitación. Desexámoslle a Yosi unha satisfactoria recuperación”, sinala o grupo.
“O Xuízo Final”, como o grupo se referiu a ese concerto, non se poderá celebrar. Polo tanto, procederase a devolución dos cartos das entradas, vendidas xa todas de antemán. “En breve anunciarase a data desde a cal se comezará a devolver o diñeiro aos miles de seguidores que compraron e esgotaron anticipadamente as entradas”, conclúe.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.