Crise interna no PP de Vigo

O PP de Vigo volve a estar inmerso nunha nova crise interna. Unha crise soterrada durante anos e que volveu saír á luz tras a decisión da voceira municipal deste partido, Elena Muñoz, de querer ocupar a secretaria local deste partido. Unha decisión que foi moi criticada por determinados sectores.

Por iso, a voceira do PP de Vigo e aspirante a presidir a formación na cidade, Elena Muñoz, negou este mércores "irregularidades" na convocatoria e proceso congresual que culminará o 17 de decembro coa elección do relevo de José Manuel Figueroa.

"As decisións que se tomaron na xunta local (que convocou a cita) foron por maioría. A igualdade está absolutamente garantida cumprindo todos os estatutos do partido e dando oportunidade a todos os militantes a presentarse reunindo os apoios e os avais establecidos. Entendo que a pluralidade é a máxima e calquera que se queira presentar pode facelo", remarcou, nunha entrevista na Radio Galega.

Pola súa banda, recordou que o pasado venres xa deu "un paso adiante" antes de engadir que, dende logo, "reafirma" o compromiso coa cidade de Vigo. O "compromiso" que adquiriu --remarcou-- hai case dous anos de "traballar de forma activa e directamente por Vigo", a súa cidade.

Muñoz defendeu que a urbe necesita "unha política e uns principios" que, ao seu xuízo, "representa o PP". "Síntome absolutamente responsable da decisión que tomei e agora quero dar outro paso adiante tamén para dirixir o PP de Vigo porque o PP de Vigo é moi necesario nesta cidade", defendeu.

Non en van, resaltou que o PP é unha formación que fixo "muchísimas cousas por esta cidade, que tivo dous grandes alcaldes, Manolo Pérez e Corina Porro, e que ten moito que decidir no futuro da cidade".

"TRABALLA MÁIS POR PONTEVEDRA"

Muñoz indicou tamén que o alcalde vigués, o socialista Abel Caballero, "parece máis preocupado pola política nacional e pola política rexional que por Vigo". De feito, incidiu que é "das cousas que máis se está a notar nesta cidade: o absoluto desapego que ten o alcalde polos problemas dos vigueses".

"Temos un alcalde que vai facendo xira por España e por Galicia, temos un primeiro tenente de alcalde que está moi ocupado na Deputación de Pontevedra e grande parte do equipo de goberno tamén está a traballar máis por Pontevedra que por Vigo. Esta é unha das razóns polas que a cidade está neste momento na situación na que está", subliñou.

De Caballero censurou a súa "prepotencia e soberbia". "Este alcalde non quere escoitar a ninguén máis que a si mesmo e este alcalde, con 17 concelleiros, ten a cidade máis paralizada que nunca na historia", resolveu.