O Parque das Galeras de Oleiros (A Coruña) pasará a chamarse Parque Fidel Castro

O Parque das Galeras, situado entre Bastiagueiro e Santa Cruz, en Oleiros (A Coruña), pasará a denominarse Parque Fidel Castro, segundo informou este sábado o concello.

Este espazo público, que se atopa en proceso de ampliación, pasará a ocupar nos próximos meses toda a franxa costeira dende Santa Cruz ata a praia de Bastiagueiro, unha superficie de máis de 100.000 metros cadrados.

O parque que levará o nome de Fidel Castro atópase nunha urbanización que ten as súas rúas dedicadas "a diferentes revolucionarios e liberadores dunha recoñecida traxectoria histórica". Aínda que a intención do Concello de Oleiros era que unha destas rúas levase o nome de Fidel Castro, a negativa do dirixente cubano de recibir este tipo de recoñecementos en vida impediu que se producise.