“Se non baixan as peaxes, que máis nos dá quen xestione a autopista”
O anuncio de que o Estado compartirá coa Xunta as decisións importantes sobre a xestión da AP-9 está a suscitar críticas en case todos os sectores políticos. Para moitos, a creación dunha comisión bilateral sen que Galicia sexa o titular da estrada, e polo tanto poida decidir por si soa asuntos como o prezo, resulta insuficiente.
Por Galicia Confidencial | Santiago de Compostela | 07/12/2016 | Actualizada ás 15:05
Caballero reclama tamén que “rapidamente se fagan os accesos dende a Avenida de Bos Aires”. Ademais, quere un “plan de choque” cando hai accidente en Rande. E é que, malia que os condutores pasen atrapados varias horas, Audasa segue a cobrarlles a peaxe. Igualiño que sucede, por exemplo, nos frecuentes embotellamentos durante o retorno das praias no verán.
O político socialista vai máis alá e pide a transferencia do tramo da AP-9 que circula polo núcleo urbano de Vigo. Neste sentido, cómpre lembrar que o Parlamento Galego reclamou a transferencia á Xunta por unanimidade pouco antes de que Alberto Nuñez Feijóo presentase este luns o acordo para a xestión compartida como unha gran vitoria.
De seguido producíronse as críticas. Por exemplo, o alcalde de Lalín, Rafa Cuíña, de Compromiso por Galicia, tirou de retranca ao escribir “Galicia sen AVE, sen traspaso da AP-9 e da AP-53, e sen proxectos de PEMEX Vota PP”. Dende a Marea Atlántica, a coalición que goberna a cidade da Coruña, interprétase que “a petición unánime do Parlamento de Galicia vai ao lixo”.
Para Luís Villares, voceiro de En Marea, “Feijoo compórtase como o Delegado do Goberno en Galicia, non coma o Presidente de Galicia”. Dende o BNG vese inútil o pactado. “Para vir dicir que da ap9 nanai e que o AVE "algún día" o ministro ben podía ter collido ponte de feriado”, escribiu a deputada Noa Presas tras a noticia coñecida este luns. O Bloque interpreta que “Feijóo dá un paso atrás e rompe a unidade das forzas políticas aceptando o veto á transferencia da AP-9”.
Audasa, a empresa privada que xestiona a autopista pública, ten a concesión até 2048. Nos seus programas electorais, todos os partidos con representación na cámara levaban reclamar o traspaso da titularidade ao Ministerio de Fomento. O Estado négase argumentado que esa estrada é parte da rede ministerial debido a súa importancia.
Argumentación de Feijóo
No tocante á xestión da autoestrada do Atlántico, o responsable do Executivo autonómico ten, como era de agardar, unha visión diferente. Feijóo pon en valor a decisión de crear unha comisión bilateral Goberno central-Comunidade Autónoma para compartir todas as decisións de xestión da AP-9. E promete que as primeiras decisións de xestión que se compartirán son a confirmación de que os accesos á Cidade da Cultura estarán nos presupostos de 2017 e de que as bonificacións das peaxes na Barcala e na Ponte de Rande serán financiadas integramente pola Administración central.
“Sobre a autoestrada do Atlántico avanzamos máis ca nunca, porque por primeira vez o Goberno de España acepta que as decisións da autoestrada que afectan a Galicia se teñan que consensuar coa Comunidade”, asegurou o luns o titular da Xunta.
Diante disto, Feijóo comprometeu que a Comunidade poderá investir os 6 millóns de euros anuais que destinaba ás bonificacións destas peaxes a seguir mellorando as infraestruturas viarias en Galicia, “moi especialmente á autovía do Morrazo”. Se ben, recoñeceu que o Executivo autonómico seguirá formulando a transferencia da titularidade da AP-9 “e, por suposto, o Ministerio de Fomento, no contexto da política nacional, irá valorando esa proposta”. “O ministro é perfectamente consciente de que hai unanimidade política en Galicia en relación coa solicitude do traspaso da titularidade da autoestrada á Comunidade. Pero tamén é consciente de que esa demanda obedece a uns problemas de xestións que na nosa opinión veñen existindo desde hai moito tempo coa autoestrada do Atlántico”, abundou.
