O BNG propón "revitalice" o espazo fronteirizo cunha autoridade única de gobernación para o Miño

A portavoz nacional do BNG, Ana Pontón, anunciou que a súa formación porá en marcha unha ofensiva institucional para reclamar a creación dunha autoridade única de gobernación para o espazo transfronteirizo Río Miño, co obxectivo de preservar e pór en valor este territorio que cualifica de "clave" para Galicia e "deixar atrás o abandono" que sofre por parte tanto dos estados dos que depende como da propia Xunta.

"Facemos esta proposta para acabar co abandono por parte de todas as administracións dun territorio fundamental para o noso país", recalcou. Pontón fixo este anuncio en Tui, onde presidiu a reunión interparlamentaria do BNG á que asistiron cargos da formación para, baixo o título 'O río Miño transfronteirizo: un espazo estratéxico para Galicia', analizar a importancia xeoestratégica deste territorio para Galicia, con problemas de carácter ambiental, económico e social que necesitan dunha "alternativa política solvente" e "ambiciosa".

Entre outros cargos, ao acto, do que informou o BNG nun comunicado, asistiron á reunión a eurodeputada Ana Miranda, a senadora Carme da Silva e alcaldes e alcaldesas da comarca do Baixo Miño. A proposta nacionalista pasa pola creación dun instrumento de gobernación específico con cesión de competencias por parte dos dous estados, así como de recursos económicos. "En definitiva", apuntou Pontón, "unha autoridade única de gobernación conxunta para a toma de decisións en todos os asuntos importantes para a boa xestión deste territorio", desde protección e mellora ambiental ata a aplicación e interpretación de normativas, a xestión da pesca ou a promoción económica e o desenvolvemento turístico.

Para todo iso, o BNG propuxo financiar a autoridade única cos fondos transfronteirizos que neste momento "xestionan os estados e a Xunta" e que, segundo denuncia, "non están a chegar realmente ao territorio". "Temos que facer que eses recursos cheguen á poboación que os necesita", dixo.

Segundo denunciou, a día de hoxe non existe ningún organismo que controle as augas ou asuma o control de verteduras contaminantes e, por iso, a situación ambiental do río está cada vez máis degradada. No mesmo sentido, considerou "imprescindible" o dragado do estuario do Miño, que o Goberno do Estado "deixou de facer" hai anos "provocando desequilibrios ambientais".

SANIDADE PRIVADA

Por outra banda, a portavoz nacional do BNG, Ana Pontón, trasladou este venres a súa "preocupación" ante os movementos de Vivalto Santé, principal accionista do grupo Ribeira Saúde (propietario do hospital Povisa), cesando a dous dos directivos, e por como poderían afectar á atención aos pacientes, e esixiu ao presidente da Xunta, Alfonso Rueda, "transparencia" sobre o contrato millonario que o Sergas asinou co hospital privado, que é centro de referencia para 120.000 galegos.