Impunidade para os asasinos de Jimmy

Sostén o xuíz Pedro Merchante Somalo que “resulta imposible” identificar os autores materiais da morte de Jimmy, como tampouco resulta críble a versión ofrecida pola testemuña protexida G303, que na súa declaración apuntou a catro persoas como culpábeis do asasinato, as mesmas ás que apuntaban as investigacións policiais. Nun auto do pasado 14 de decembro, o titular do xulgado de instrución número 20 de Madrid decretou o arquivo da causa que investigaba a morte do seareiro deportivista Francisco Javier Romero Jimmy.

Pancarta dos Riazor Blues no partido de Copa Dépor-Betis. | Fonte: @fpdeportivistas

En troques, a familia do seareiro dos Riazor Blues xa recorreu o auto e defende que hai “indicios” de presuntos culpábeis. A acusación particular que representa aos familiares de Jimmy xa presentou o seu recurso de reforma de apelación ante o xulgado madrileño. A familia considera que “hai indicios dabondo na investigación policial” para identificar os presuntos culpábeis da súa morte.

Como se temía o deportivismo, tras máis de dous anos de pescudas sen éxito, o xuíz Merchante Somalo acordou o sobresemento provisional e arquivo da peza separada denominada “homicidio y lesiones", aberta hai pouco para a investigación da morte do seareiro deportivistas e das lesións sufridas por Santiago Abaga, o outro afeccionado deportivista que foi guindado ao río Manzanares. O xuíz afirma que “no se puede identificar a nadie con un mínimo de seguridad o fiabilidad” ante “la falta de testigos presenciales” y debido a la “mala calidad del vídeo aportado” por unha testemuña.

A familia de Jimmy considera “determinante” que se chame a declarar á testemuña protexida, como solicitou a Fiscalía, xa que “non se pode inhabilitar a súa testemuña previamente sen escoitalo en sede xudicial”. Non opina así o xuíz, quen sostén que a testemuña xa declarou no xulgado de Menores e, ademáis, lembra que a Audiencia Provincial de Madrid xa desmontou o seu relato. “Dicha declaración no constituye prueba alguna que permita la identificación de los autores”, argumenta Merchante Somalo. “No se trata de un testigo sino de un coimputado protegido”, engade.

Contundente comunicado do Deportivo

O Deportivo volveu reclamar “xustiza para Jimmy” a través dun contundente comunicado no que acusa ás autoridades de “desidia e impunidade” á hora de buscar os culpábeis do asasinato de Jimmy. O club presidido por Tino Fernández expresou a súa “profunda sorpresa, absoluta decepción e total indignación ante o arquivo da causa” e amosou a súa “solidaridade a toda a familia e amigos de Jimmy”.

Pancarta coa lenda 'Jimmy vive' que abría a marcha. | Fonte: @RB1987Oficial

“Con absoluto respecto á xustiza, neste caso no que un cidadán coruñés e seguidor deportivista foi asasinado, queda patente o rotundo fracaso da mesma ao pecharse o procedemento sen ter determinado quen son os culpábeis. En pouco máis de dous anos pasouse dunha posición tallante por parte de todas as autoridades competentes para tratar de solucionar o caso á desidia e impunidade polo sucedido en Madrid”, apunta o club herculino. Ademáis, o consello de administración ofrece "apoio nas accións que poidan levar a cabo de agora en diante co xusto obxectivo de que, nun Estado de dereito, haxa, nalgún intre: Xustiza para Jimmy”.

“Paréceme unha vergonza. Dende o principio todo o proceso foi moi raro, Deben de levar na causa uns catro ou cinco xuíces diferentes, parece que están buscando un que lles conveña o que vai ditar, e ao final parece que o van conseguir”, denunciou Tania Gómez, presidenta da Federación de Peñas do Deportivo.

“Cando un caso desta gravedade, un homicidio, a través das cámaras como todos puidemos ver, queda arquivado sen darlle solución, sen esclarecer os feitos nin os responsábeis, é unha mala nova, unha falla de xustiza para as víctimas e para a sociedade. A todos os que cremos na Xustiza parécenos unha mala nova”, comentou pola súa parte o alcalde Xulio Ferreiro.