Denuncian a situación de abandono dos animais nunha canceira de Ferrol
Axena asegura que unha cadela Boxer que pesaba só 18 quilos, engordou dez un mes despois de saír de alí. A canceira de Mougá deféndese asegurando que conseguiu novos amos para 338 animais en 2016.
Por Galicia Confidencial | Ferrol | 30/01/2017 | Actualizada ás 09:15
A Asociación de defensa da natureza Axena denuncia o estado de abandono no que se atopan os animais, principalmente cans, que se atopan na canceira de Mougá, pertencente á Mancomunidade de Concellos da Comarca de Ferrol, así como o conxunto das instalacións
Así, nun artigo publicado na súa web e difundido a través das redes sociais, Axena denuncia o mal estado no que se atopan os canís, “que non protexen aos cans, moitos deles de avanzada idade, das choivas e o frío no inverno nin da calor no verán porque o teito é moi pequeno, e o número de casetas por canil é moi inferior ao de cans polo que a maioría non poden resgardarse”.
Ademais, apunta que a hixiene dos canís é “a miúdo moi mellorable, non sendo raro que se atopen cheos de feces”. Así mesmo, indica que moitas veces a limpeza dos mesmos faise a mangueirazos, cos cans dentro. “Non parece o mellor sistema para non empapar nin asustar aos pobres cans”.
Tamén denuncia o estado dalgúns animais. En concreto, critica a situación dunha cadela bóxer que levaba 5 meses no refuxio e pesaba 18 quilos, e nun só mes adoptada engordou 10 quilos, ou o dun can adegueiro, que “tamén saíu nos ósos, con infección de sangue e unha carracha enquistada”.
Propietarios para 338 animais
A canceira de Mougá depende dos concellos de Ares, Cabanas, Cedeira, Fene, Ferrol, Mugardos, Narón, Neda e Valdoviño. A xerencia deste centro negou estas denuncias e asegura que o centro e as súas dependencias cumpren con todos os requisitos para os coidados dos animais e que non hai cans en situación de abandono.
En declaracións a La Voz, a dirección da canceira asegura que conseguiu novos amos para 338 animais e logrou que outros 196 que se perderon volvesen ás súas familias durante o ano pasado. Con todo, non puido evitar a eutanasia para 39 cans, 64 gatos e un cabalo.
O Concello tamén destaca o gran número de abandonos que se produciu o ano pasado no que chegaron ás dependencias desta canceira 621 animais, dos que case todos, foron cans (387) e gatos (207). Así mesmo, lembra que o refuxio atendeu a 817 animais en doce meses, dos que 566 foron cans, 215 gatos, sete cabalos e 27 doutras especies.
