Colectivos da Terra Chá participan na Mesa de Turismo organizada pola Deputación de Lugo

O deputado de Turismo de Lugo, Eduardo Vidal Baamonde, participou este xoves en Vilalba (Lugo), xunto con representantes dunha vintena de colectivos e concellos da Terra Chá, na mesa de traballo do sector turístico organizada polo goberno provincial.

Durante a reunión, Vidal Baamonde destacou a "gran implicación e participación" das institucións e entidades da Terra Chá, entre as que estiveron representados os municipios de Vilalba, Meira, Muras, Xermade, A Pastoriza, Begonte, Guitiriz e Cospeito.

Os participantes debateron durante tres horas acerca dos aspectos máis relevantes para impulsar o turismo na Terra Chá e coincidiron en sinalar os recursos hídricos como os humidais, os ríos e os muíños de auga como un dos principais elementos identitarios.

Así mesmo, propuxeron a creación de rutas que combinen, ao mesmo tempo, propostas culturais, gastronómicas e naturais e incidiron na necesidade de mellorar a sinalización dos recursos turísticos.