Os defensores da lingua quentan motores para unha protesta histórica
O PSdeG adianta o seu apoio á protesta do Días da Letras, que este mércores vivirá o seu primeiro ensaio xeral cunha folga no ensino.
Por Galicia Confidencial | O Irixo | 08/05/2010 | Actualizada ás 21:24
Mocidade pola Língua, a organización de mozos da Mesa pola Normalización, convoca unha folga nos ensino secundario para o próximo mércores. Ademais haberá varias manifestacións en Vigo, Ourense, Compostela e Lugo.
Os defensores da lingua quentan así motores para a gran cita do 17 de maio. O Día das Letras Queremos Galego prepara unha manifestación en Compostela que os críticos coa deriva españolista PPdeG agarda rache todas as marcas, incluída a deste xaneiro, cando se encheu o Obradoiro nun día laborábel.
Na fronte política, ademais dos nacionalistas, que controlan a maioría da Plataforma, e de Esquerda Unida, o PSdeG xa anunciou a súa asistencia, aínda que fica a dúbida se asistirá Francisco Caamaño, ministro de Xustiza.
O PP agarda que escampe
Na Nécora son conscientes de que a lingua é un dos seus principais problemas. Por iso os conservadores miden os tempos da tramitación do Decreto do Galego, paralizado tras a negativa non vinculante do Consello Escolar.
Malia que a marxe para tramitalo no Parlamento a tempo de que estea listo para o próximo curso é reducida, a polémica 'contrarreforma' non chegará ao Hórreo até despois do Día das Letras. Tampouco haberá, polo menos nas vindeiras semanas, traducións ao español de Castelao no Parlamento.
