O Lugo, vitoria e co-liderado

Ficha técnica:
AD Alcorcón 0: Casto; Laure, David Fernández, Hugo Álvarez, Soriano; Errasti; Álvaro Peña (Nono, 65’), Toribio, Dorca (Borja Domínguez, 82’), Álvaro Giménez e Borja Lázaro (Jonathan Pereira, 69’).
CD Lugo 1: Juan Carlos; Campadabal, Bernardo Cruz, Ignasi Miquel, Luis Ruiz; Seoane, Ramón Azeez; Iriome, Campillo (Albarracín, 77’), Polaco Fydriszewski (Mario Barco, 84’) e Cristian Herrera (Sergio Díaz, 62’).
Gol: 0-1: Ignasi Miquel (minuto 92).
Árbitro: Prieto Iglesias (navarro). Amarelas a Errasti (minuto 82) no Alcorcón e a Campillo (30’) e Mario Barco (87’) no Lugo.
Incidencias: partido da 10ª xornada de Segunda División disputado no estadio de Santo Domingo ante 2.125 espectadores.

“Esta vitoria é para Galicia e para todos os guerreiros que axudaron na extinción do lume. Orgullosos da nosa xente #ForzaGalicia”. Con esta mensaxe en twitter celebrou o CD Lugo a sús vitoria en Alcorcón.

Outra volta no tempo engadido, como co Zaragoza e co Barça B. Un gol de Ignasi Miquel no minuto 92 deulle a vitoria ao Lugo en Alcorcón, a primeira en seis visitas ao estadio Santo Domingo en Segunda División. É o sexto triunfo lucense en dez xornadas, máis un empate, que lle serve para ser co-líder da categoría con 19 puntos, os mesmos que Osasuna.

O meta Juan Carlos foi o grande protagonista lucense no primeiro acto, cun paradón a remate de Dorca que evitou que o Alcorcón, necesitado tras catro derrotas consecutivas, se adiantase no marcador. O partido mudou tralo descanso, cando o Lugo mellorou, adiantou as súas liñas e comezou a chegar con ocasións á área rival. A primeira foi un disparo de Campillo que parou Casto e pouco despois un remate de Cristian Herrera. O Lugo estaba preto do gol, liderado por Ramón Azeez, e buscou con ambición a meta rival nos últimos minutos. A insistencia lucense tivo recompensa no tempo engadido, cun tanto de Ignasi Miquel, que rematou coa testa unha falta lanzada con precisión por Nico Albarracín.