A Xunta incrementa un 9% a partida para dependencia coa idea de chegar a 60.000 persoas

A Xunta de Galicia inclúe nos seus orzamentos de 2018 un 9% máis de orzamento para o programa de atención á dependencia, co obxectivo de atender a 60.000 persoas nesta situación.

Así o recolle o documento que este xoves analizou o Consello da Xunta e que especifica que a partida para dependencia crecerá en 31 millóns de euros, ata os 369 millóns.

En concreto, as libranzas do coidador soben en 17 millóns de euros e activarase a apertura de nove centros de atención de maiores, con 160 novas prazas de residencia e 245 en centros de día.

Ademais, aumenta un 12,8% o Servizo de Axuda no Fogar, ata 67 millóns; e destinaranse 2,9 millóns para atender 5.000 novos servizos de teleasistencia.

Así mesmo, continuarase co apoio ás familias e á infancia con case nove millóns máis para medidas de conciliación e dinamización demográfica, a apertura de novas escolas infantís en Ourense, Santiago, Lugo, Mos e A Estrada e a extensión da Tarxeta Benvida ata o tres anos para familias con rendas baixas.

A Renda de Integración Social de Galicia (Risga) contará con 62,5 millóns de euros e traballarase para reforzar o apoio ás entidades de iniciativa social.

NOVAS INFRAESTRUTURAS SANITARIAS

No ámbito da saúde, as Contas autonómicas destinan case 88 millóns para a transformación e modernización do mapa sanitario. Esta contía irá destinada a novas infraestruturas en Ferrol, Pontevedra e Lugo; á ampliación do Hospital Clínico de Santiago e a nova facultade de Medicina, ao plan director do Hospital de Ourense ou a obras e equipamentos na EOXI da Coruña.

Ademais, contémplanse máis de 300 novas prazas de profesionais sanitarios, das que 100 son especialistas médicos, e aumentan 134,1 millóns de euros (un 13,2%) as achegas para incremento e mellora da actividade.

Os orzamentos de 2018 inclúen máis de 13 millóns (un 9% máis) para programas de vacinación e prevén a extensión do programa de detección precoz do cancro de colon e recto para cidadáns de 50 a 69 anos con 3,4 millóns de euros.

FOMENTO DA FP E INVESTIMENTOS

No campo da educación, as Contas apostan polo fomento da FP, con ampliación de prazas, obras de mellora e acondicionamento de centros educativos (7,3 millóns) e novos investimentos en Soutomaior, Culleredo, Novo Mesoiro, Lamas de Abade, Tui, Ames e Outeiro de Rei.

Para modernización, destinaranse 5,8 millóns para o plan e fomento de educación dixital, e 4,2 millóns para o plan integral de aprendizaxe de idiomas estranxeiros.

Finalmente, sobe un 8% a partida para actuacións culturais, ata os 69 millóns e haberá 1,5 millóns de euros para campañas de normalización lingüística.