Temas: VELLEZ

Estarías disposto a envellecer compartindo a túa casa con outros maiores?

O Co housing, as vivendas compartidas entre xubilados para un evellecemento máis activo, chega ao Parlamento de Galicia.

Por Galicia Confidencial | Compostela | 13/12/2017 | Actualizada ás 09:35

Comparte esta noticia

É xa unha realidade nos países do norte de Europa. O Co housing, a tendencia a compartir casa entre as persoas maiores e con necesidades semellantes, xa chegou a Galicia. A Comisión de Ordenación Territorial do Parlamento aprobou este martes unha proposición non de Lei do Grupo Socialista para impulsar esta práctica. A portavoz de Vivenda do PSdeG, María Pierres, defendeu esta proposta para impulsar en Galicia o modelo nórdico que defende un envellecemento activo máis saudable cun menor consumo de recursos socio – sanitarios.

Dúas persoas maiores e xubiladas tentan disfrutar da súa vellez
Dúas persoas maiores e xubiladas tentan disfrutar da súa vellez | Fonte: canarias7

Así, o Parlamento galego reclamoulle á Xunta que promova e impulse medidas destinadas a establecer formas alternativas de vivenda  para as persoas maiores nas que se fomente o envellecemento activo e se proporcione ás persoas maiores “o pleno control sobre os espazos que habitan e o modo en que queren envellecer”.

Entre estas medidas están a de poñer en marcha medidas de colaboración co sector privado que favorezan o acceso a solo público ou vivendas para rehabilitación a través da cesión de uso, dereito de superficie, compravenda con pago aprazado ou arrendamento. Tamén implantar programas de asesoramento e información para dar a coñecer estas novas fórmulas habitacionais e facilitar o acceso dos promotores deste tipo de vivendas colectivas ás axudas públicas.

GALICIA, UN PAÍS ENVELLECIDO

Pierres reclamou traer a Galicia “modelos de innovación social” e instou a “deixar de facer políticas de reparación unha vez chegados os problemas” xa que, advertiu, España será en 2050 o país con maior porcentaxe de maiores do mundo, e Galicia, xunto con Asturias, será “a rexión máis envellecida do mundo”. Reclámalle así ao goberno galego que poña en marcha un Plan de fomento de novas solucións habitacionais para colectivos de maiores”.

Por iso apostou por un modelo que naceu nos países escandinavos hai 3 décadas e que “mestura nun mesmo entorno residencial a dimensión privada, común e pública dos seus residentes a través dun acceso á vivenda non especulativo”. Nela “todos os membros do complexo residencial son socios dunha cooperativa que é propietaria das vivendas e cede aos residentes o uso de por vida”.

Subliñou a importancia de “fomentar non só edificacións e construcións, senón o impulso e fomento de creación desas comunidades e dos valores comúns que compartirían, e que son as que asegurarían o seu éxito”.

BABY-BOOM

“Trátase de impulsar un envellecemento máis saudable e, polo tanto, cun menor consumo de recursos socio – sanitarios, que garante á xeración do baby-boom un envellecemento con calidade de vida, activo, digno e consciente, centrado na autoxestión e lonxe de fórmulas tuteladas”, dixo.

A responsable socialista explicou que estas solucións “dan resposta a unha demanda crecente da poboación, con independencia das idades, e soluciona o grave problema asistencial e de servizos” para as persoas maiores. Quere responder a unha “xente concienciada de que os traballos de coidado de maiores son insostibles nas familias e xeran formas de explotación que sofren especialmente as mulleres”.

Sinalou que hoxe o 39,6 por cento das mulleres maiores de 85 anos viven soas, fronte ao 25,9 por cento dos homes, derivado da maior lonxevidade delas, pero que reflicte o aumento de situacións de soidade non desexada que pode paliarse a través destas fórmulas. 

Temas: VELLEZ
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta