Por E.P. | SANTIAGO DE COMPOSTELA | 04/01/2018 | Actualizada ás 14:08
A organización xuvenil do BNG, Galiza Nova, celebra este ano o 30 aniversario da súa fundación, en 1988, tempo no que a súa función principal se centrou en "achegar" os valores do nacionalismo aos mozos galegos.
O responsable do BNG en Santiago, Rubén Cela, incidiu en que "30 anos son moitos na historia de calquera organización", pero máis aínda na historia de "unha organización política xuvenil", xa que a mocidade é "un sector que experimenta cambios moito máis rápidos" que o conxunto da sociedade.
Rubén Cela explicou que, desde a súa fundación, Galiza Nova "cumpriu cos seus tres grandes obxectivos": achegar o "nacionalismo e os seus valores" aos mozos; "denunciar e dar alternativas" aos problemas da mocidade galega (desigualdade, educación ou o servizo militar obrigatorio); e servir de "escola de cadros" para o nacionalismo, xa que desta organización procede xente como a propia portavoz nacional do Bloque, Ana Pontón, entre outros altos cargos do partido.
Ademais, o responsable local do BNG remarcou que "é un orgullo" poder dicir que "a maior parte das novas altas de afiliación" ao partido "proceden de mozos que formaban parte de Galiza Nova".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.