Por Europa Press / Redacción | Santiago de Compostela | 03/02/2018 | Actualizada ás 13:41
Máis da metade das queixas que tramita A Mesa pola Normalización Lingüística sobre problemas de atención ou mal uso da lingua galega teñen que ver coa administración pública, tanto central como local e autonómica. Entre as empresas, Google e Ikea son as que rexistran maior número de denuncias. Estes principais datos que se extraen do balance anual da ferramenta 'A liña do galego', o servizo da Mesa para recibir opinións, tanto negativas como positivas, sobre o respecto aos dereitos lingüísticos no ámbito privado e público.
O presidente da Mesa, Marcos Maceira, presentou este sábado os resultados referentes ao pasado ano, acompañado por Celia Armas e Elsa Quintas.
A Mesa abriu en 2017 un total de 289 expedientes de queixas, 20 de consultas e 54 felicitacións a través de chamadas telefónicas, correos electrónicos e mensaxes na aplicación móbil de 'A liña do galego'.
Entre as queixas destacan as relativas a "discriminacións e exclusións lingüísticas", cun 38 por cento, seguidas polas que denuncian a deturpación da toponimia (28 por cento) e pola "negación" a ser atendido en lingua galega (14 por cento).
OS ORGANISMOS DA XUNTA, OS MÁIS DENUNCIADOS
Máis da metade destas denuncias, un 56 por cento, proceden do ámbito da administración pública, sendo as institucións que dependen da Xunta as que máis queixas acumulan cun 47 por cento, polo 31 e o 22 por cento que se reparten a local e a central, respectivamente.
Con todo, os concellos concentran un 27 por cento dos expedientes dirixidos á administración pública, mentres que o Sergas faino nun 20 por cento e a Xunta de Galicia nun 15.
A directora de 'A liña de galego', Celia Armas, puxo o foco en que "quen debe velar polo cumprimento" da lei de normalización lingüística, como é a administración pública, é "a maior incumpridora", aínda que tamén incidiu en que no sector privado "queda moito por avanzar".
EMPRESAS PRIVADAS
En canto ás entidades privadas, as empresas que reciben o maior número de queixas son, por esta orde, Google, Ikea e Abanca, seguidas de Movistar e o Banco Santander, así como El Corte Inglés. A Mesa tamén salienta a exclusión xeralizada do galego nos seguros denunciados recentemente.
Por outra banda, A Mesa anunciou que creará un indicativo para sinalar os establecementos que reciben boas referencias polo emprego do galego.
"POUCAS NORMAS" AMPARAN O GALEGO
Así as cousas, entre as conclusións que A Mesa extrae sobre este balance anual resalta que a realidade "obriga" ao usuario a "renunciar" ao uso do galego "cando se dirixe á administración ou as empresas que prestan un servizo" que, "en moitas ocasións", mesmo cometen "coaccións evidentes".
Ademais, apuntan que a Administración autonómica, "con funcións e competencias" para garantir os dereitos lingüísticos do galegofalante, "non só abdica da súa responsabilidade senón que é a primeira en incumprir as súas propias normas".
Deste xeito, A Mesa insta á Xunta a tomar exemplo dos gobernos vasco e catalán e sinala que, de existir unha "sensibilidade" desde a administración de Galicia similar á de Euskadi e Cataluña, o respecto á lingua propia na actividade empresarial tamén sería "diferente".
Nesta liña, denuncia que "as escasas disposicións que amparan o galego" se incumpren "día a día", o que contrasta co "cumprimento rigoroso das 500 disposicións que obrigan ao uso do español".
Por iso, A Mesa pola Normalización Lingüística chama á cidadanía a "rachar a normalidade e impunidade da exclusión do galego" a través de denuncias e reclamacións "dentro e fóra" das fronteiras de Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.