Por Galicia Confidencial | Vigo | 28/02/2018 | Actualizada ás 13:39
A Oficina de Dereitos Sociais de Coia, en Vigo, vén de denunciar que o alcalde da cidade, o socialista Abel Caballero, lles aplicou a chamada Lei Mordaza do Goberno central do Partido Popular —criticada por prácticamente toda a oposición, tamén polo PSOE— para "acalar" as protestas deste colectivo.
O pasado 19 de decembro, esta plataforma convocaba unha concentración na avenida de Castelao de Vigo baixo o lema “Caballero, o lado escuro das políticas sociais”. O acto, recordan, "contaba cos permisos pertinentes, porén descoñeciamos que non tiñamos o visto e prace do alcalde". Unha afirmación que se basea nos "comportamento dos axentes da Policía Local que acudiron ao acto e da sanción de cen euros recibida o 26 de febreiro por Esther Lora (avogada e compañeira da ODS-Coia)", relata o colectivo.
Durante aquela concentración produciuse un accidente de tráfico, cun motorista implicado, pero sen graves consecuencias, aínda que suscitou un enfrontamento verbal entre manifestantes e policías.
Agora, expoñen, "amparado na Lei Mordaza", un axente da policía lles comunicou: "A consecuencia de un accidente de tráfico, la denunciada se dirige a viva voz al policía 294106 gritándole: «no estáis haciendo nada», «la culpa es vuestra», generando reacciones entre el público presente al grito de “«mucha, mucha policía!», y provocando que fotógrafos de prensa presentes en el lugar comenzaran a fotografiar a los actuantes".
Uns feitos que supoñen unha “falta de respecto e consideración aos membros das Forzas e Corpos de Seguridade” e son sancionados cunha multa económica de cen euros, segundo a denuncia.
A ODS-Coia considera que este feitos "en realidade non son máis que a constatación da actitude neglixente dos axentes da Policia Local que acudiron á concentración para regular o tráfico, por imperativo legal e por indicación da Subdelegación, e que tiñan a obriga de garantir a integridade física das participantes, dos viandantes e dos vehículos, por existir un corte de tráfico autorizado; pero seica cando as concentracións se fan no barrio [de Coia] ou para denunciar a miseria das políticas do que lles dá de comer, esa obriga legal desaparece", censuran.
Os activistas acusan ao alcalde —ao que chaman "Caballero Vader"— de usar a "represión e mentiras" na súa “exitosa forma de goberno". Consideran que "nunha cidade con superávit non pode ser que teñamos un gasto social precario (tan só 42,43 euros por habitante)", o cal "é sancionable". "Sábeno as compañeiras da Acampada Contra a Pobreza, que levan semanas de acoso por denunciar o maltrato e abandono do goberno municipal ás persoas sen fogar", engaden desde a ODS-Coia.
"Temos a conciencia ben tranquila, e sabemos que as acusacións dos axentes carecen de toda xustificación, e só responden a un intento do alcalde de acalar a protesta da maneira máis vil posible", insisten os activistas, que din que irán ao xulgado a "dirimir as mentiras" e que seguirán "na loita por un modelo de cidade na que todas teñamos garantido unha vida digna".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.