Rueda di aos sindicatos que con "cifras inasumibles non haberá solución"

O vicepresidente da Xunta, Alfonso Rueda, reclamou  "responsabilidade" aos sindicatos de xustiza e, despois de reiterar que a última proposta do Executivo autonómico, sitúa ao colectivo de funcionarios de xustiza galegos "na media" salarial que demandaban, avisou: "Se nos piden cifras inasumibles, non poderá haber unha solución".

En declaracións aos medios en Betanzos, onde participou nunha visita ás instalacións da Asociación Mirabal, Rueda insistiu en que a última oferta da Administración galega, unha subida de 105 euros máis ao mes para todos os corpos, cumpre "co mandato parlamentario" e co que "se pedía" por parte dos sindicatos. Reafirmou que os funcionarios xudiciais galegos quedarían por encima da media tanto se se contabilizan as 17 comunidades (cómputo que facía a Xunta) coma se considéranse as 12 con competencia transferida e o 'territorio Ministerio' coma se fose "unha única" autonomía, na liña das táboas que manexaban os sindicatos.

Os sindicatos xa rexeitaron na pasada xornada esta afirmación. Suxeriron que Rueda ten "un problema coas matemáticas", pero o vicepresidente insistiu este martes na súa formulación e, sen verbalizar ningunha nova data para sentar, reiterou que o venres houbo "unha reunión longa" na que a Xunta "fixo as súas ofertas e cumpriu con todo o que se pide". Ademais, incidiu en que tamén se tiveron en conta outros "puntos", en alusión a unha proposta de subida liñal para todos os corpos e que se empezase a cobrar parcialmente en 2018. Así, volveu a pedir "reflexión" aos sindicatos e aos propios funcionarios, "que se dean conta de que o que se pedía está sobre a mesa".

"ESTA SITUACIÓN DEBE ACABAR"

Rueda repetiu que se o que ocorre é que cando a Xunta expón "como acordo", o que "se está pedindo" por parte dos sindicatos e logo "non o hai", tocará preguntarse "se as reunións valen para algo máis que para seguir prolongándoas eternamente".

"Esta situación debe acabar" di Rueda que manifestou que "non hai dúbida" da vontade negociadora da Xunta, polo que volveu pedirlle aos funcionarios xudiciais que analicen "o que propuxo a Xunta" para "constatar que é aquilo que se pedía". Todo iso, antes de instar os representantes sindicais a ter "responsabilidade" como "está a ter a Xunta".

"UNHA FOLGA DE CONTIDO ECONÓMICO"

Ante a contraposición de cifras entre os 105 euros máis ao mes que oferta a Xunta e o incremento de 190 dos sindicatos, e se esta é unha diferenza insalvable, Rueda replicou que "efectivamente" e recalcou que esta é "unha folga de contido económico", xa que se "se están discutindo cifras".

A continuación, defendeu que a Xunta "negocia" desde a "responsabilidade" dado que a subida parte "do diñeiro público que os galegos pagan cos seus impostos". Remarcou que o "esforzo" que fai o Goberno autonómico é, en consecuencia, "o esforzo que fai a xente cos seus impostos e que se traduce en chegar a esa media que se pedía". Dito isto, deixou dito que se os representantes dos traballadores "piden cifras inasumibles, non poderá haber unha solución". "Témolo que dicir así", defendeu, antes de concluír que o colectivo ten que ser consciente de que a Xunta puxo sobre a mesa "o que pedía".