Feijóo insta os sindicatos de xustiza a "seguir as instrucións" dos traballadores

O presidente da Xunta, Alberto Núñez Feijóo, instou aos sindicatos de xustiza a "seguir as instrucións" dos traballadores do sector, ao entender que "dixeron si ao acordo" cando, na pasada xornada, votaron de forma maioritaria autorizar aos negociadores a rebaixar a esixencia salarial de 190 euros máis ao mes para tentar buscar unha saída á folga que empezou o 7 de febreiro.

Manifestouno na mesma xornada na que o comité de folga, no que están representados SPJ-USO, Alternativas na Xustiza-CUT, UXT, STAJ, CSIF, CIG e CC.OO., decidiu convocar á Xunta para volver reunirse o vindeiro luns, día 26 de marzo, para retomar o diálogo.

A decisión foi adoptada polos sindicatos nunha reunión mantida este xoves en Ourense, na que analizaron o resultado da votación na que un 65,9% de funcionarios de xustiza que participaron deron o visto e prace para que os sindicatos negociasen "o mellor posible" pero sen que os 190 euros fosen unha "postura mínima obrigatoria".

Nesta conxuntura, Feijóo lembrou que a Xunta puxo na última reunión a "oitava oferta" sobre a mesa, que se concreta nunha subida de 135 euros máis ao mes para os forenses, 133 para os xestores, 108 para os tramitadores e 105 para os de auxilio. Unha proposta que as organizacións sindicais rexeitaron por insuficiente.

Pero o presidente incidiu, de novo, en que se incluíu "unha cláusula de garantía" para que, no caso de que as comunidades que "aínda teñen salarios máis modestos" experimentase unha subida "superior", puidésese "revisar" o acordo galego.

Con esta subida e o incremento pactado en Madrid para todos os empregados públicos, incidiu en que a proposta se traduciría nun custo por traballador de "entre 3.000 e 4.000 euros máis ao ano".

"COÑECÍAN A PROPOSTA DA XUNTA"

"Agradezo moito a responsabilidade dos traballadores, o 70 por cento dixeron que si ao acordo e espero que os sindicatos o entendesen. Agradezo que os traballadores mandasen a mensaxe de que queren acordo, non conflito", remarcou Feijóo, quen puxo o acento en que os traballadores se pronunciaron "coñecendo os termos da proposta da Xunta".

"Espero que os representantes dos traballadores sigan as súas instrucións", sentenciou.